په نیپال کې چارواکو ویلي چې په دغه هېواد کې د سېلابونو له امله د مړو شمېر ۹۵ کسانو ته رسېدلی او نږدې ۴۰۰ نور کسان، چې بهرني سیلانیان هم په کې شامل دي، لادرکه دي.
د نیپال د پولیسو ویاند «ابي نارایان کافله» فرانس پرېس خبري اژانس ته ویلي چې تر اوسه د سېلاب له امله د ۹۵ کسانو د مړینې راپور ورکړل شوی دی.
بلخوا، رویټرز د نیپال د ګرځندوی وزارت له قوله راپور ورکړی چې د سېلابونو له راوتلو وروسته لږ تر لږه ۳۴۱ بهرني وګړي لادرکه شوي دي.
د نیپال د پولیسو ویاند ویلي چې د لادرکه شویو کسانو په ډله کې ۲۸ پولیس هم شامل دي.
د نیپال د ګرځندوی بورډ مشر «حکمت سینګ آیر» بيبيسي ته ویلي چې په لادرکه شویو کسانو کې له ۱۰۰ ډېر هندي وګړي، ۱۷ مالیزیایان، ۱۲ بریتانویان، څلور د سویلي افریقا وګړي او د امریکا، اسټرالیا او هالنډ اتباع شامل دي.
د راپورونو له مخې، ډېری دغه کسان د تبت په «کایلاش مانسرووار» سیمې ته روان وو؛ هغه سیمه چې طبیعي او مذهبي سیاحتي ارزښت لري.
د نیپال پولیسو تر دې مخکې ویلي وو چې د دغه هېواد او چین په سرحدي سیمو کې د پراخو سېلابونو له امله لږ تر لږه اته کسان وژل شوي دي.
د نیپال د پولیسو او د ټولنیزو رسنیو د کاروونکو لهخوا خپرې شوې ویډیوګانې د چین پولې ته څېرمه د همالیا په غرنیو درو کې د خټو اوبو د سخت جریان صحنې ښيي.
دغه سېلاب د نیپال او چین ترمنځ د پولې په اوږدو کې د تبت د خودمختارې سیمې په «ګیرونک» بندر کې راوتلی دی. په دې سیمه کې د کال په همدې موسم کې د کورنیو او بهرنیو سیلانیانو ګڼ حضور لیدل کېږي.
د سېلاب له امله زیانمنه شوې لار د «لانګټانګ» ملي پارک او «ګوسایکوندا» ته د لاسرسي له مهمو لارو څخه هم ده. ګوسایکوندا د غرونو په منځ کې یو سپېڅلی جهیل دی چې خلک د عبادت او مذهبي مراسمو لپاره ورځي.
نړیوالو رسنیو راپور ورکړی چې په سېلاب ځپلو سیمو کې د ژغورنې او مرستې عملیات لا هم روان دي او ښايي د مړو شمېر نور هم لوړ شي.
