د اوکراین د جګړې په اړه د امریکا د پلاوي او د روسیې د ولسمشر ولادیمیر پوتین ترمنځ لیدنه «ګټوره» بلل شوې، خو دغه لیدنه له کومې رسمي هوکړې او مشخصې پایلې پرته پای ته رسېدلې ده.
د امریکا د ولسمشر ډونالډ ټرمپ ځانګړو استازو، سټیو ویتکاف او جرد کوشنر، پرون (شنبه، د وږي ۱۴مه) د روسیې په مسکو کې د کرملین په ماڼۍ کې له ولادیمیر پوتین سره لیدنه وکړه.
د روسیې د ولسمشر مرستیال یوري اوشاکوف ویلي چې له ویتکاف او کوشنر سره د پوتین لیدنه تر درېیو ساعتونو زیاته اوږده شوه او په ترڅ کې یې «ګټورې» خبرې وشوې.
روسي خبري اژانس «تاس» د اوشاکوف له قوله لیکلي چې په دې لیدنه کې د «جګړې د ټولو بنسټیزو لاملونو د له منځه وړلو» پر اړتیا ټینګار وشو.
اوشاکوف ویلي: «په ځانګړې توګه، د جګړې په سیمه کې د روسي پوځ د پرمختګ واقعي بریاوې تر بحث لاندې ونیول شوې، د ټاکل شویو موخو د ترلاسه کولو په اړه ډاډ څرګند شو او، البته، د جګړې د ټولو بنسټیزو لاملونو د له منځه وړلو پر اړتیا ټینګار وشو.»
په همدې حال کې، رویټرز خبري اژانس د سپینې ماڼۍ د یوه چارواکي له قوله لیکلي چې د ډونالډ ټرمپ استازو له پوتین سره د اساسي موضوعاتو په اړه خبرې کړې دي.
رویټرز لیکلي چې دغه څو ساعته لیدنه او خبرې اترې «له کومې رسمي هوکړې او مشخصې پایلې پرته پای ته ورسېدې».
د دې رسنۍ د راپور له مخې، پوتین د اوکراین د جګړې د پای ته رسولو لپاره د امریکا د ولسمشر ډونالډ ټرمپ د هڅو ستاینه کړې ده. هغه ویلي چې ټرمپ، سره له دې چې شرایط ستونزمن دي، د یوې هوکړې د ترلاسه کولو لپاره خپلې هڅې نه دي درولي.
دا په تېرو ۱۸ میاشتو کې له پوتین سره د ویتکاف او کوشنر اتمه لیدنه وه.
د سپینې ماڼۍ یوه چارواکي رویټرز ته ویلي چې دا لیدنې به دوام ولري او له روسي ولسمشر سره د امریکا د پلاوي د راتلونکو خبرو اترو پړاوونه به په راتلونکو اوونیو کې اعلان شي.
