د ملګرو ملتونو د بشري حقونو شورا د یوې پرېکړهلیک په تصویب سره د افغانستان لپاره د ځانګړي راپور ورکوونکي په توګه د ریچارډ بېنېټ ماموریت د یوه بل کال لپاره وغځاوه.
د ملګرو ملتونو د بشري حقونو شورا د اعلامیې له مخې، دغه پرېکړهلیک نن (دوشنبه، د تلې ۱۳مه) له رایې اخیستلو پرته تصویب شو.
ښاغلي بېنېټ پر اېکس لیکلي چې د نوي پرېکړهلیک له مخې، هغه موظف شوی چې په افغانستان کې د «اقلیتونو» د وضعیت په اړه یوه څېړنه چمتو کړي او د ۲۰۲۷ کال په سپټمبر کې یې د دغې شورا په غونډه کې وړاندې کړي.
هغه زیاته کړې چې په دغه پرېکړهلیک کې د ۲۰۲۷ کال د جون په میاشت کې په افغانستان کې د جنسیت اړوندو اندېښنو په اړه د تمرکز لپاره د «پرمختللي متقابل بحث» د ترسره کولو وړاندوینه هم شوې ده.
د افغانستان لپاره د بشري حقونو د ځانګړي راپور ورکوونکي په توګه د ریچارډ بېنېټ ماموریت په داسې حال کې غځول کېږي چې لا هم افغانستان ته د هغه پر سفر بندیز لګېدلی دی.
طالبانو د ۱۴۰۳ لمریز کال د زمري په میاشت کې افغانستان ته د ښاغلي بېنېټ پر ننوتلو بندیز ولګاوه او هغه یې پر ځان د «پروپاګند» په کولو تورن کړ.
د ملګرو ملتونو د بشري حقونو شورا څو ځله د دغه بندیز د لرې کولو غوښتنه کړې، خو طالبان لا هم ښاغلي بېنېټ ته افغانستان ته د سفر اجازه نه ورکوي.
ریچارډ بېنېټ له هغه وخت راهیسې چې د افغانستان لپاره د بشري حقونو د ځانګړي راپور ورکوونکي په توګه ټاکل شوی، په افغانستان کې د بشري حقونو د وضعیت په اړه ګڼ راپورونه چمتو کړي او د طالبانو له لوري د خلکو د غیرقانوني وژنو، خپلسرو نیونو، ځورونې، شکنجې او د بشري حقونو او د افغانستان د خلکو د اساسي حقونو د سرغړونو ګڼې پېښې یې مستندې کړې دي.
