د امریکا حکومت غواړي د هغو کډوالو د ایستلو د پالیسۍ په چوکاټ کې چې درېیمو هېوادونو ته لېږدول کېږي، یو شمېر افغان کډوال پاکستان ته ولېږدوي.
د بلومبرګ خبري شبکې د دوشنبې په ورځ (۴ عقرب) د امریکا د فدرالي حکومت د باخبره چارواکو او د پناهغوښتونکو د ملاتړ د بنسټونو په حواله دا راپور خپور کړی دی.
د امریکا د فدرالي حکومت یوه چارواکي، د کډوالۍ وکیلانو او د پناهغوښتونکو د ملاتړ سازمانونو ویلي چې له دې پلان څخه خبر شوي دي. د کډوالو د احتمالي ایستلو الوتنه لا په رسمي ډول نه ده اعلان شوې، خو تمه ده چې په راتلونکو څو اوونیو کې ترسره شي.
د دې رسنۍ د راپور له مخې، د امریکا د کډوالۍ ادارې چارواکو یو شمېر نیول شویو افغان کډوالو ته خبر ورکړی چې پاکستان ته به وشړل شي.
د بلومبرګ سرچینو ویلي، په هغو کسانو کې چې ټاکل شوې پاکستان ته ولېږدول شي، د ځینو هغو کسانو خپلوان هم شامل دي چې کابل ته د طالبانو له ننوتلو مخکې یې له امریکایي پوځ سره همکاري کړې وه.
د «افغانایواک» سازمان تایید کړې چې د نیول شویو کسانو له لوري ورته ورته اندېښنې رسېدلې دي.
دغه سازمان ویلي، داسې معلومات یې ترلاسه کړي چې ښيي د امریکا د لویزیانا ایالت څخه د نیول شویو افغان کډوالو د لېږد لپاره د یوې ځانګړې الوتنې پلان شوی دی.
تر اوسه د امریکا او پاکستان حکومتونو چارواکو په دې اړه په رسمي او علني ډول څه نه دي ویلي.
افغانایواک وایي، یو شمېر نیول شویو کسانو ته ویل شوي چې پاکستان ته به ولېږدول شي؛ خو یوې بلې ډلې ته بیا خبر ورکړل شوی چې د دوی د لېږد مقصد افغانستان دی.
افغانایواک د خپلو سرچینو په حواله، چې د امریکا په حکومت کې دي، ویلي چې ښایي پاکستان د درېیم هېواد په توګه وکارول شي او له هغه ځایه دغه کسان افغانستان ته ولېږدول شي.
افغانایواک وایي، په تېرو دوو اوونیو کې یې د امریکا په ۱۱ ایالتونو کې له ۱۵ توقیفخونو څخه د افغان کډوالو د «احتمالي لېږد» په اړه لږ تر لږه ۳۰ راپورونه ترلاسه کړي دي.
امریکا تر دې مخکې هم درېیمو هېوادونو ته د کډوالو د ایستلو پروګرام عملي کړی دی.
د بېلګې په توګه، اسوشیټېډ پرېس خبري اژانس دوه میاشتې مخکې راپور ورکړی و چې د سنبلې په ۷مه لسګونه کډوال، چې ۱۲ یې د افغانستان اتباع وو، له امریکا څخه د مرکزي افریقا جمهوریت پلازمېنې بانګي ښار ته لېږدول شوي دي.
د دې رسنۍ د راپور له مخې، یو ۲۰ کلن ځوان هم مرکزي افریقا جمهوریت ته شړل شوی و، چې وروڼو یې د افغانستان په پخواني نظام کې له امریکایي پوځ سره همکاري کړې وه.
په هغه وخت کې د دغه ځوان وکیل، آلما ډیویډ، ویلي وو چې یوه امریکایي قاضي افغانستان ته د هغه د شړلو مخه نیولې وه، ځکه وېره وه چې طالبان به هغه وځوروي.
