اطلاعات روز: په هیواد کې د بشري مرستو په دوام د ترکیې هیواد د «افاد» بنسټ په مالي لګښت په پکتیا ولايت کې په ۱۰۰۰ بېوزله کورنیو د لومړنيو خوراکي توکو مرسته ووېشل شوه، چې د مسوولینو په وینا په دې توکو کې اوړه، غوړي، چای، بوره او وریژې شاملې دي.
دغه مرسته نن (شنبه، د لېندۍ ۲۰مه) ووېشل شوه. په افغانستان کې د افاد بنسټ مسوول سید مبین هاشمي وايي، دوی د پکتيا سربېره د هيواد په ګڼو نورو ولایتونو کې هم د ورته مرستو لړۍ پيل کړې ده.
په همدې حال کې بیا د کډوالو او بیرته راستنېدونکو چارو وزارت يو تن نماينده قاري اجمل پکتيا ته په سفر کې له افغانانو سره د اسلامي هیوادونو بشري مرستې اړینې بولي، خو وايي، که د هیواد کنګل شوې پیسې د طالبانو حکومت ته وسپارل شي، نو شته اقتصادي ستونزې به تر ډېره ورسره هوارې شي.
په پکتیا ولایت کې د دې مرستو تر لاسه کولو لپاره له بېلابېلو سیمو راغلي بېوزله کسان چې ښځې او ماشومان هم په کې شامل دي، دا ډول همکاري اړینه بولي او غوښتنه کوي، چې د شته ستونزو هواري لپاره دې ځوانانو ته کاري فرصتونه برابر شي.
د ترکیې هیواد له لوري دا په پکتیا کې لومړۍ ځل دی، خو د نظام له بدلون وروسته په تېرو څلورو میاشتو کې بېلابېلو همکاره موسساتو له خلکو سره د خوراکي او نورو وسایلو مرستې کړې دي.
