د هیواد د نورو زونونو سربېره په ختیځ زون کې د داعش ډلې فعالیتونه ډېر دي او تر دې دمه یې د ګڼو بریدونو مسوولیت هم په غاړه اخیستی دی. د د غې وسله والې ډلې د ځپلو لپاره طالبانو په ځینو سیمو کې چاڼیز عملیات هم ترسره کړي، خو لاهم یاده ډله په بشپړه توګه له منځه نه ده وړل شوې.
اوس د ختیځ زون د ځینو ولایتونو اوسېدونکي شکایت کوي، چې د کاروبار لپاره سویل ختیځ زون پکتیا، پکتیکا او خوست ولایتونو ته د تګ پر مهال د داعش په تور ځورول کیږي او ځینې وخت یادو ولایتونو ته د داخلېدو اجازه نه ورکول کیږي، خو د پکتیا طالب امنیتي مسوولین بیا دا ادعا په کلکه ردوي.
د ننګرهار ولایت اوسېدونکی چې ځان په مستعار نوم جمیل معرفي کوي، اطلاعات روز سره یې په خبرو کې وویل، د کاروبار لپاره خوست ولایت ته روان و، چې په لاره کې د طالبانو د پلټنځای امنیتي کسانو له پوښتنو او ګروېګنو وروسته اجازه ور نه کړه، چې یاد ولایت ته دې داخل شي.
هغه وايي، د خپل ولایت د نوم له ورمعرفي کېدو وروسته یې په دې تور د تګ مخه ونیوله، چې ننګرهار کې د داعش فعالیت ډېر شوی دی.
نوموړي وویل: «زه اونۍ وړاندې خوست ولایت ته روان وم، له هغه ځایه مې دوکان ته جلغوزي راوړل، چې د پکتیا او خوست ترمنځ په یو چیک پواینټ کې ودرول شوم، د ځان له معرفي کېدو وروسته د طالبانو امنیتي کسانو راته وویل، چې ننګرهار کې داعش زیات فعالیت لري، نو مونږ نه شو، کولی له همدې وېرې تاته اجازه درکړو.»
د خان زمان په نوم د نورستان ولایت اوسېدونکی، چې په تعمریاتو کې د پلسترکارۍ استاد دی، هغه هم له ورته پېښې سره مخ شوی. نوموړی وايي، د وزې ځدران ولسوالۍ اړوند سیمه کې په دې نوم ځورول شوی، چې د نورستان اوسېدونکي وهابیان دي او زیاتره یې له داعش سره اړیکه لري.
د نوموړي په وینا چې دا ډول پېښو سره مخ کېدو یې نه یوازې په کاروبار منفي اغېز کړی، بلکې په ذهني ډول هم شکنجه شوی دی.
هغه وویل: «زه د پلسترکارۍ استاد یم، پخوا مونږ په پکتیا او خوست کې په نویو جوړېدونکو تعمیرونو کې پلستر کاوه او له کومې وېرې پرته به مو هر ولایت ته سفر کاوه، خو د طالبانو په راتګ اوس هماغسې ډاډه نشو تللی، یوه ورځ زه په دې نوم درولی شوی وم، چې د نورستان خلک وهابیان دي او وهابیان له داعش سره اړیکه لري.»
په همدې حال کې بیا د پکتیا ولایت طالب امنیتي چارواکي دا ادعا په کلکه ردوي او وايي، دوی له توپیري چلند پرته د امنیت ساتنې لپاره په پلټنځایونو کې خلک تلاشي کوي.
د دې ولایت د امنیت آمر مولوی کرامت وايي، تر اوسه داسې پېښه نه دی رامنځته شوې، چې د هیواد د کوم بل زون اوسېدونکی دې، د داعش او نورو وسله والو ډلو په نوم پکتیا او یا هم خوست ته د تګ اجازه نه وي ورکړې.
کرامت زیاته کړه، چې اوس مهال په هیواد کې امنیتي تهدیدات په دومره لویه کچه نه دي، چې خلک دې په پلټنځایونو کې وځورول شي.
هغه وویل: «مونږ له هیچا سره مشکل نه لرو، زمونږ هدف فقت د امنیت راوستل او د خلکو د سر او مال ساتنه ده، مونږ دا د دښمن تبلیغات بولو او خپلو مجاهدالدینو ته مو دا سپارښتنه کړې، چې له خلکو سره ښه چلند وکړي، نو که پکتیا او یا هم خوست ولایتونو ته څوک راځي، په ډاډه زړه دې راشي او د سویل ختیځ زون د اوسېدونکو په ډول به له دوی هم د امنیت خوندیتوب لپاره پوښتنې کوي.»
د کابل – ګردېز او ګردېز – خوست ترمنځ پر غځېدلو لویو لارو کې د امنیت ساتنې په موخه ځای پر ځای شوي طالب ځواکونه هم د ختیځ زون د اوسېدونکو ځورول او یا هم ورته اجازه نه ورکول په کلکه ردوي.
هغوی وايي، په شخصي او سورلۍ موټرو کې له ټولو سپرو مسافرو د امنیت ساتنې لپاره یو ډول پلټنه کوي.
په دې اړه د طالبانو یو تن امنیتي سرتیري معاویه وویل: «الحمد الله مونږ شپه او ورځ دلته د خلکو د سر او مال ساتنې لپاره دنده ترسره کوو، مونږ هیڅ دا ډول څه نه دي کړي، چې له خلکو سره دې ناسم چلند وکړو او یا دې هم دوی په یو او بل نوم وځورو، هر څوک چې په دې لارو تګ، راتګ کوي، له هغوی نه په ډېر احترامانه ډول پوښتنه کیږي او رخصت کیږي.»
که څه هم تر اوسه په سویل ختیځ زون کې د داعش فعالیت نه دی تر سترګو شوی، خو د خلکو اندېښنه دا دی، چې د هوا له تودې سره سم د دغه زون په ځینو سیمو کې هم نا امني رامنځته شي، خو د پکتیا ولایت امنیتي چارواکي د هر ډول امنیتي ګواښونو د مخنیوي لپاره د چمتوالي خبر ورکوي.