د چین له پولې سره نږدې د نیپال په سیمو کې د سختو سېلابونو له امله د مړو شمېر ۳۵۹ تنو ته رسېدلی او له زرو ډېر کسان لا هم ورک دي.
د رویټرز د راپور له مخې، د نیپال چارواکو له چورلکو څخه د ژغورل شویو کسانو د لټون او هغو زرګونو خلکو ته د بېړنیو مرستو د رسولو لپاره کار اخیستی چې په اغېزمنو ښارونو او درو کې بند پاتې دي.
ځايي رسنیو د مړو شمېر ۳۵۹ تنه ښودلی دی. لسګونه جسدونه هم سېلابونو هوارو سیمو ته انتقال کړي او د هغوی د لېږد او پېژندنې چارې لا هم روانې دي.
د نیپال د کورنیو چارو وزیر سودان ګورونګ ویلي چې د عملیاتو تمرکز لا هم د ژوندي پاتې شویو کسانو پر موندلو دی.
د ژغورنې ډلې په ترېشولي سیمه کې، چې تر ټولو ډېره زیانمنه شوې، ۱۰۰ هندي اتباع، چې ډېری یې زیارت کوونکي دي، او ۲۵ چینايي کارګران موندلي دي. دغه کسان تر دې مخکې ورک شوي وو.
له ۶۵۰ ډېر بهرني اتباع لا هم ورک دي او د نیپال چارواکي تر اوسه نه دي توانېدلي چې د ورک شویو اتباعو کره شمېر معلوم کړي.
سره صلیب ویلي چې په دې پېښه کې کلي ویجاړ شوي او د سړکونو بندېدو او پلونو ویجاړېدو له امله ګڼې ټولنې له مرستو څخه بې برخې شوې دي.
دغه ادارې زیاته کړې چې د دې ناورین بشپړ زیانونه لا هم روښانه نه دي.
د چین دولتي ټلوېزیون، سيسيټيوي، د پنجشنبې په ورځ ویلي چې د تبت په سیمه کې د جیرونګ ولسوالۍ د ورک شویو کسانو شمېر ۵۵۸ تنو ته رسېدلی، چې ۲۶۰ یې بهرني اتباع دي. چین ویلي چې په دغه هېواد کې د مړو شمېر لا هم درې تنه دی.
بلخوا، د نیپال د طبیعي پېښو د مدیریت ادارې خبرداری ورکړی چې هغه جهیل چې د چهارشنبې ورځې د سېلاب په سیمه کې د سیند د لارې د بندېدو له امله جوړ شوی، د اوبو کچه یې مخ پر لوړېدو ده او د طبیعي بند د ماتېدو خطر شته.
