د کاناډا د بهرنیو چارو وزارت له خپلو وګړو غوښتي چې «په افغانستان کې د ناپایدار امنیتي وضعیت، ترهګریزو بریدونو، روانو وسلهوالو نښتو، د انسانتښتونې، نیول کېدو او خپلسرو توقیفونو د خطر، د جرمونو د لوړې کچې او د طالبانو د چارواکو له لوري د بشري حقونو د پراخو سرغړونو» له امله افغانستان ته له هر ډول سفر څخه ډډه وکړي.
دغه وزارت په یوه اعلامیه کې ویلي چې په افغانستان کې امنیتي وضعیت لا هم ډېر ناپایدار او خطرناک دی.
د کاناډا د بهرنیو چارو وزارت خپلو وګړو ته ویلي: «که تاسو په افغانستان کې یاست، د اړتیا په صورت کې د خوندي ځای ته د لېږد او د خپل شخصي امنیتي پلانونو د بیا ارزونې په اړه احتیاط وکړئ. په یاد ولرئ چې د خپل ځان او خپلې کورنۍ د امنیت مسؤولیت ستاسو پر غاړه دی.»
دغه وزارت زیاته کړې چې په افغانستان کې د کاناډا سفارت خپل فعالیتونه ځنډولي او په افغانستان کې د قونسلي مرستو او نورو ملاتړونو د وړاندې کولو لپاره د کاناډا وړتیا ډېره محدوده ده.
کاناډا تر دې وړاندې هم څو ځله له خپلو وګړو غوښتي وو چې د امنیتي خطرونو له امله افغانستان ته سفر ونه کړي.
کاناډا په افغانستان کې د طالبانو له بیا واکمنېدو وروسته په دغه هېواد کې خپل سفارت تړلی او د طالبانو حکومت په افغانستان کې په رسمیت نه پېژني.
خو له دې سره سره، کاناډا ګڼو افغان سیاسي او فرهنګي فعالانو، ښځو او خبریالانو ته پناه ورکړې او هغوی یې له افغانستان څخه، چې د طالبانو تر کنټرول لاندې دی، بهر انتقال کړي دي.
