اطلاعات روز: وزارت معارف کشور می‌گوید که به ادامه‌ی سلسله کمک‌های مردمی، یک عالم دین در ولایت لوگر به مساحت 400 متر مربع زمین شخصی خود را برای معارف اهدا کرده است.
نوریه نزهت، سخن‌گوی وزارت معارف امروز (شنبه، 7 سرطان) به روزنامه اطلاعات روز گفت که یک عالم دین به نام احمدالله عابد در ولسوالی بره‌کی برک ولایت لوگر این مقدار زمین شخصی خود را برای ساخت یک مکتب به معارف اهدا کرده است.
خانم نزهت گفت که قرار است در سال جاری از طریق پروژه‌ی «اقرأ» ساختمان مکتب مختلط «شاه‌ویس قرن» بالای این زمین اعمار شود.
به گفته‌ی او، این مکتب یک‌هزار و 105 دانش‌آموز دارد که 383 دانش‌آموز آن دختران هستند.
این در حالی است که براساس معلومات وزارت معارف، شهروندان کشور در سال گذشته خورشیدی، به ارزش بیش از 773 میلیون افغانی کمک‌های نقدی و غیرنقدی به معارف اهدا کرده‌اند.