عکس: via DW

دِکر: «نشست امنیتی هرات» منجر به گفت‌وگوی افغان‌ها در داخل و خارج از افغانستان شود

کرن دِکر، کاردار سفارت امریکا برای افغانستان امیدواری کرده است که «گفت‌وگوهای امنیتی هرات» به یک گفت‌وگوی جهانی میان افغان‌ها در داخل و خارج از افغانستان تبدیل شود.

دهمین دور گفت‌وگوهای امنیتی هرات اخیرا در دوشنبه، پایتخت تاجیکستان برگزار شد.

کرن دِکر که در این نشست شرکت کرده بود، امروز (پنج‌شنبه، ۱۰ قوس) در رشته‌توییتی نوشته است که وقتی افغان‌ها در مورد افغانستان صحبت می‌کنند، احساس انرژی پیدا می‌کنند.

او نوشته است: «من بیشتر تحت تأثیر زنانی از افغانستان، هند، تاجیکستان و جاهای دیگر قرار گرفتم که از سکوت خودداری کردند و همتایان مرد خود را به چالش کشیدند تا صحبت کنند و کارهای بیشتری انجام دهند.»

دِکر از تاجیکستان و مرکز مطالعات استراتژیک افغانستان برای برگزاری نشست امنیتی هرات سپاس‌گزاری کرده و گفته که امیدوار است بذرهای کاشته شده در این نشست منجر به گفت‌وگوی بین‌المللی بین‌افغان‌‌ها در داخل و خارج از کشور شود.

دور دهم نشست سالانه‌ی «گفت‌وگوهای امنیتی هرات» به روزهای سه‌شنبه و چهارشنبه برگزار شد.

موضوع این نشست «نظام سیاسی همه‌شمول؛ الگوها و نقشه‌ راه» بود.