وزارت خارجه‌ی تاجیکستان می‌گوید که هیأتی از این وزارت در جریان سفر به لندن با لئو دوچرتی، معاون امور خارجه‌ی بریتانیا گفت‌وگو کرده است. وضعیت افغانستان از محورهای این گفت‌وگو بوده است.
در اعلامیه‌ی وزارت خارجه‌ی تاجیکستان آمده است که در این گفت‌وگو، طرفین در مورد طیف گسترده‌ای از موضوعات مورد همکاری دوجانبه‌ی بریتانیا در زمینه‌های سیاسی و اقتصادی، سرمایه‌گذاری و تجارت، تهدیدهای امنیتی مانند تروریسم و افراط‌گرایی تبادل نظر کردهاند.
به نقل از اعلامیه، تقویت مرزها و حمایت فنی از پروژه‌ها و برنامه‌های انرژی «سبز» تاجیکستان و اهمیت سازماندهی سفرهای مقامات عالی‌رتبه‌ی دو کشور از دیگر موضوعاتی بود که در این گفت‌وگوی سیاسی مورد بحث و بررسی قرار گرفت.
وزارت خارجه‌ی تاجیکستان گفته است که در پایان این گفت‌وگوی سیاسی، سران هیأت‌ها سند تفاهم همکاری بین وزارت امور خارجه‌ی جمهوری تاجیکستان و وزارت امور خارجه و توسعه بین‌المللی بریتانیای کبیر و ایرلند شمالی را امضا کردهاند.
به‌گفته‌ی این وزارت، هیأت‌های تاجیکستان و بریتانیا توافق کردند که به گفت‌وگوی سازنده به منظور تقویت روابط در زمینه‌های مورد علاقه‌ی دوجانبه ادامه دهند.
مقامات تاجیکستان در حالی با مقامات بریتانیایی درباره‌ی افغانستان گفت‌وگو کرده که کشورهای پیمان امنیتی جمعی نگران نفوذ گروه‌های تروریستی از افغانستان به کشورهای عضو اند.
به‌تازگی یوری شووالوف، نماینده‌ی دبیرخانه سازمان پیمان امنیت جمعی گفته است که کشورهای عضو این سازمان در حال گفت‌وگو با طالبان برای تقویت امنیت در منطقه هستند.