سه منبع امنیتی تاجیک به خبرگزاری رویترز گفتند که تاجیکستان برای حفاظت از مرزهایش با افغانستان، خواستار کمک روسیه شده است.
یک منبع در شورای امنیت تاجیکستان به رویترز گفته است که مقامهای این کشور با روسیه در مورد احتمال استقرار نیروهایی از پایگاه نظامی مسکو در این کشور آسیای میانه برای گشتزنی مشترک در مرز تاجیکستان و افغانستان گفتوگو کردهاند.
پایگاه روسیه در تاجیکستان که بزرگترین تأسیسات نظامی خارجی روسیه است، در نزدیکی دوشنبه، پایتخت تاجیکستان، قرار دارد.
این منبع به رویترز گفته است: «ما در حال حاضر در حال مذاکره هستیم. فکر میکنم تصمیمی در این مورد گرفته خواهد شد… این هفته.»
دو منبع دیگر در کمیته دولتی امنیت ملی تاجیکستان نیز مذاکرات با روسیه را تأیید کردند و گفتند که در صورت موفقیت، روسیه از بالگردها برای کمک به گشتزنی در مرز ۱۳۴۴ کیلومتری (۸۳۵ مایلی) با افغانستان استفاده خواهد کرد.
تاجیکستان همواره درباره ناامنی در شمال افغانستان ابراز نگرانی کرده است.
در هفته گذشته، در نتیجه حملات انجامشده از افغانستان، پنج شهروند چینی در نزدیکی مرز کشته و پنج نفر دیگر زخمی شدهاند.
امام علی رحمان، رییسجمهور تاجیکستان، روز دوشنبه با رؤسای آژانسهای امنیتی خود در مورد وضعیت گفتوگو کرده است.
چین به شهروندان خود که در فعالیتهای مختلف معدن و تجارت در تاجیکستان مشغول هستند، توصیه کرده است که فوراً منطقه مرزی را ترک کنند.
امیرخان متقی، وزیر خارجه طالبان، با وزیر خارجه تاجیکستان تلفنی گفتوگو کرده و گفته است که «افغانستان و تاجیکستان اخیراً فضای اعتمادی را برای همکاریهای سیاسی، اقتصادی و امنیتی ایجاد کردهاند، اما برخی حلقهها در تلاش هستند تا این روند مثبت را تضعیف کنند.»
متقی افزوده است که طالبان آماده تقویت امنیت مرزی، انجام تحقیقات مشترک و انجام هرگونه هماهنگی است و اقدامات مشترک علیه عناصر شرور را ضروری میداند.
