اطلاعات روز: ارزګان کې روغتيايي مسوولين وايي، د دغه ولايت په بېلابېلو سيمو کې عام خلک دې ته راضي شوي چې خپلې شخصي ځمکې د روغتیایي مرکزونو جوړولو لپاره دوی ته په واک کې ورکړي.
ارزګان کې د (MOVE) موسېسې يو تن مسوول ډاکټر محمد داود زاهد وايي، په ټول ولايت کې ۵۶ روغتيايي مرکزونه شتون لري، چې د ودانیو جوړولو لپاره یې عامو خلکو په هره سیمه کې خپله دوه جریبه ځمکه د روغتیایي مرکز لپاره وقف کړې ده.
نموړی زیاتوي:« د ارزګان په لېرې پرتو سيمو کې روغتيايي خدمات ډير زيانمن شوي موږ ته خلکو د ۵۶ روغتيايي مرکزونو لپاره د يوه جريبه څخه تر ۲ جریبه پورې ځمکه راکړه چې موږ به هلته روغتيايي مرکزونه ورباندې جوړ کړو او ترڅنګ به يې يوه يوه روغتيايي پوسته په څنګ کې جوړه کړو چې د دغه نويو پوستو لپاره به ۱۱۲ روغتيايي کار کوونکي په دندو هم وګمارو»
ورته مهال د ارزګان ولایت د عامې روغتیا ریاست یوتن استازی ډاکټر قدرت الله بیانزی بیا وایي، «همدا سلګونه رضاکاران دي چې د روغتیا څرخ یې په دوران راوستلی او هدف ته یې رسولی دی.»
نوموړی وايي، چې روغتيايي برخه په هېواد کې يوه اساسي برخه ګڼل کيږي او په کار ده چې په دې برخه کې لاهم خدمات زيات شي.
دغه راز عام خلک هم د دغو خدماتو هرکلی کوی خو غوښتنه کوي چې په روغتيايي برخه کې لاهم ستونزې شته چې باید ورته پاملرنه وشي.
د دغه ولايت يوه اوسيدونکي شفيع الله له مسوولينو غوښتنه کوي چې په ټولو روغتيايي مرکزونو کې دې خدمات پراخ شي او ودانۍ دې ورته جوړې شي.
تردې وړاندې په دغه ولايت کې روغتيايي مسوولينو خبر ورکړی و چې ۴۲ روغتيايي مرکزونه د شخصې کورونو څخه خدمات وړاندې کوي او له روغتيا وزارت څخه يې غوښتنه کړې وه چې دغه برخې ته پاملرنه وکړي.
