اطلاعات روز: د مرکزي اسيا د هيوادونو مشرانو او اروپايي شورا په قرغيزستان کې د خپلې دويمې ناستې په پای کې د يوې ګډې اعلاميې له لارې په افغانستان کې د ټول ګډونه حکومت د جوړولو پر ارزښت او په دې هيواد کې بشري حقونو ته پر درناوي ټينګار کړی دی.
دا غونډه پرون د جمعې په ورځ (۱۲ د غبرګولي) د قرغيزستان په چولپون آتای ښار کې د مرکزي اسيا د پنځو هيوادونو د مشرانو او د اروپايي شورا د رييس شارل ميشل په ګډون جوړه شوې وه.
د دې غونډې په وروستۍ اعلاميه کې راغلي، چې ټولو ګډونوالو د افغانستان د مخ پر خرابېدونکي وضعيت په اړه اندېښنه ښودلې ده.
دوی ويلي، چې يوه امن، سولیيز، باثباته او پرمختللي افغانستان ته ژمن دي.
د مرکزي اسيا د هيوادونو مشرانو او اروپايي شورا له نړيوالې ټولنې مننه کړې چې له ستونزو سره – سره يې خپلو مرستو ته دوام ورکړی دی.
دوی له نړيوالې ټولنې غوښتي چې د افغانستان له خلکو سره دې خپلې بشري مرستې زياتې کړي.
د مرکزي اسيا د هيوادونو مشرانو او اروپايي شورا د يوه ټول ګډونه حکومت د جوړولو پر اهميت، بشري حقونو او د افغانستان د ټولو وګړو په ځانګړې توګه د ښځو، نجونو او قومي ډلو اساسي ازاديو ته پر درناوي ټينګار کړی دی.
دوی د اروپايي ټولنې او مرکزي اسيا تر منځ د خبرو د دوام غوښتنه کړې او دا خبرې يې مهمې بللې دي.
د افغانستان لپاره د اروپايي ټولنې او مرکزي اسيا د هيوادونو ځانګړو استازو هم د ترکمنستان په عشق آباد کې د خپلې غونډې په وروستۍ اعلاميه کې ټينګار کړی و چې په افغانستان کې دې ټول ګډونه حکومت جوړ شي او په دې هيواد کې دې پر ښځو او نجونو د طالبانو لګېدلي بنديزونه لغوه شي. دا غونډه د می پر ۲۵مه او ۲۶مه جوړه شوې وه.
