اطلاعات روز: د شانګهای د همکاريو د سازمان د غړو هيوادونو مشرانو د خپلې غونډې په وروستۍ اعلاميه کې چې پرون (سېشنبه، ۱۳ د چنګاښ) د هند په کوربتوب جوړه شوه، ويلي چې په افغانستان کې د دې هيواد د قومي، ديني او سياسي استازو په ګډون سره د يوه ټول ګډونه حکومت جوړول اړین دي.
دا اعلاميه چې د هند د بهرنيو چارو وزارت له لوري خپره شوې، پکې راغلي چې د شانګهای غړي په دې باور دي چې د شانګهای د همکاريو سازمان په سيمه کې د امنيت او ثبات د پياوړي کولو يو تر ټولو مهم عامل دادی چې د افغانستان وضعيت ته رسيدګي وشي.
دوی ويلي، چې د يوه خپلواک، بې پرې، متحد، ډيموکراټيک او سولييز افغانستان ملاتړ کوي چې له تروريزم، جګړې او نشه یي توکو پاک وي.
د شانګهای د غونډې په وروستۍ اعلاميه کې راغلي، چې د دې سازمان غړي د افغانستان په ټولنه کې د شته ټولو قومي، مذهبي او سياسي ډلو د استازو په مشارکت سره په افغانستان کې د يوه ټول ګډونه حکومت جوړول ضروري ګڼي.
تر دې وړاندې هم د هيوادونو مشرانو په افغانستان کې د يوه ټول ګډونه حکومت پر جوړولو ټينګار کړی دی. ويل کېږي چې د داسې يوه دولت جوړول د طالبانو د حکومت په رسميت پېژندنې لپاره د يو شمېر هيوادونو شرط دی، خو دا ډله ادعا کوي چې اوسنی حکومت يې ټول ګډونه دی په داسې حال کې چې د حکومت ټول غړي طالبان دي.
د شانګهای غړو له نړيوالې ټولنې غوښتي چې خپل هيواد ته د افغان کډوالو د پتمنې، خوندي او پايدارې راستنيدنې اسانچارې دي برابرې کړي.
دوی په خپله اعلاميه کې ويلي، چې په افغانستان کې بدلېدونکي بشري وضعيت ته په پام سره د افغانستان له خلکو سره د مرستو د دوام د هڅو ملاتړ کوي.
د شانګهای د همکاريو د سازمان درې ديرشمه غونډه پرون د هند د لومړي وزير نريندرا مودي په کوربتوب په مجازي توګه ترسره شوه.
ښاغلي مودي په دې غونډه کې د خپلو خبرو پر مهال وويل، چې د افغانستان وضعيت د شانګهای د همکاريو سازمان د غړو هیوادونو پر امنيت مستقيم اغېز لري او ټينګار يې وکړ چې له دې خاورې دې د افراطيت او ناامنۍ د ترويج لپاره استفاده نه کېږي.
د پاکستان لومړي وزير شهباز شريف په دې غونډه کې د خپلو خبرو پر مهال له طالبانو سره د نړۍ د «معنادار تعامل» غوښتنه وکړه.
