اطلاعات روز: د ايران ولسمشر ابراهيم رييسي په دوشنبې کې له خپل تاجک سيال سره د یوې ګډې خبري غونډې پر مهال ويلي، چې دواړه هيوادونه په دې باور دي چې په افغانستان کې بايد داسې دولت جوړ شي چې د دې هيواد د ټولو قومونو، مذهبونو او وګړو استازيتوب وکړي.
د ايران د دولتي خبري اژانس ايرنا په وينا، رييسي ويلي، چې تاجکستان او ايران په سيمهييزو مسايلو کې ګډ نظر لري.
نوموړي زياته کړې، چې دواړه هيوادونه د افغانستان د خلکو په اړه انديښنې لري.
رييسي ويلي: «د دوو ګاونډيو په حيث تر نورو زيات د افغانستان د درنو خلکو په اړه د مسووليت احساس کوو. په دې باور يو چې په افغانستان کې بايد داسې دولت جوړ شي چې د دې هيواد د ټولو قومونو، مذهبونو او خلکو استازيتوب وکړي او وکولای شي د خپل پرمختګ لپاره اوږدمهالي ګامونه واخلي.»
تر دې وړاندې هم ايراني چارواکو او يو شمېر هيوادونو په افغانستان کې د پراخ بنسټه او ټولشموله دولت پر جوړولو ټينګار کړی وو.
اوسمهال د طالبانو حکومت يوازې د دې ډلې له غړو او تر ډېره حده له پښتنو جوړ شوی دی. د دې دولت په لوړو پوسټونو کې هيڅ ښځه او د افغانستان د شيعه او هزاره ټولنې غړی حضور نه لري.
له دې سره-سره طالبان ادعا کوي، چې د دې ډلې دولت ټولشموله دی او همدا راز د دولت جوړښت د داخلي مسايلو برخه ده او نور هيوادونه يې بايد په اړه څرګندونې ونه کړي.