اطلاعات روز: د امريکا د بهرنيو چارو وزارت وياند متيو ميلر د چين د ولسمشر له لوري د طالبانو د سفیر د باورليک منلو ته په غبرګون کې ويلي، چې بيجينګ دې روښانه کړي چې ايا طالبان يې په رسميت پېژندلي او که نه.
نوموړي پرون سې شنبه (۱۰ د سلواغې) د دې پوښتنې په ځواب کې چې ايا امريکا د چين اقدام د طالبانو د رسميت پېژندنې په معنا اخلي، وويل: «ما دا راپورونه وليدل او فکر کوم چې د چين دولت بايد [له طالبانو سره د پکن] د اړيکو په اړه خبرې وکړي او دا چې ايا دوی (چين) په رسمي توګه طالبان په رسميت پېژندلي او که نه. ما د دوی ځينې متفاوت نظرونه ليدلي دي.»
ده د خپلو خبرو په دوام سره زیاته کړې، چې د چين د ولسمشر له لوري د طالبانو د سفير د باورليک منلو په اړه په ځانګړې توګه څه نه وايي، ځکه ده ليدلي چې چين د يو لړ اعلاميو له لارې ويلي، چې د طالبانو په اړه يې درک نه دی بدل شوی.
د امريکا د بهرنيو چارو وزارت وياند زياته کړې چې دې هيواد په علني او خصوصي توګه طالبانو ته ويلي، چې له نړيوالې ټولنې سره د دې ډلې اړيکې د دوی په خپلو اقداماتو پسې تړلې دي.
ده ويلي، چې امريکا هڅه کوي چې طالبان هغه مسير بدل کړي چې تر نن ورځې پورې يې تعقيب کړی دی.
د امريکا د بهرنيو چارو وزارت وياند د يوې بلې پوښتنې په ځواب کې چې ايا متحده ايالات له چين څخه غواړي چې پر طالبانو له خپل نفوذ څخه د ښځو او نجونو د حقونو د ښهوالي لپاره استفاده وکړي، وويل: «موږ غواړو چې په افغانستان کې د ښځو او نجونو حقونو ښه شي او له طالبانو سره له هر ښکېل هيواده غواړو چې په دې برخه کې پرمختګ وکړي.»
ده د خپلو خبرو په يوه بله برخه کې يو ځل بيا ټينګار کړی چې په نړيواله توګه د طالبانو په رسميت پېژندنه تر هغو اقداماتو پورې تړاو لري چې دا ډله يې اخلي او يو ګام دادی چې په افغانستان کې له ښځو او نجونو سره په چلند کې ښه والی راشي.
له هيوادونو سره د طالبانو د اړيکو په تړاو په تازه پرمختګ کې د چين ولسمشر د طالبانو د سفير اسدالله چې په بلال کريمي مشهور دی، باورليک منلی دی.
دا لومړی ځل دی چې د يوه هيواد ولسمشر د طالبانو له لوري د ور لېږل شوي سفير باورليک مني.
تر اوسه هيڅ هيواد هم طالبان د افغانستان د رسمي حکومت په توګه په رسميت نه دي پېژندلي.