اطلاعات روز: د امريکا د بهرنيو چارو وزارت وياند متيو ميلر ويلي، چې د افغانستان په راتلونکي کې يوازې طالبان ونډه نه لري او واشنګټن د ښځو او نجونو په ګډون د دې هيواد د راتلونکي د ټاکلو په لړ کې د ټولو افغان وګړو ملاتړ کوي.
نوموړي دا څرګندونې پرون ورځ (۱ د کب) د يو خبري کانفرانس پر مهال په دوحه کې د هيوادونو د ځانګړو استازو په غونډه کې د طالبانو د نه ګډون په تړاو پوښتنې ته ځواب کې کړې دي.
ميلر ویلي، چې په دوحه کې د هيوادونو د ځانګړو استازو په غونډه کې د طالبانو په نه ګډون نه دی حيران شوی او دا ډله متفاوت اهداف لري.
ده زياته کړې، چې د امريکا موخې درې دي او د دوحې په غونډه کې يې تعقيب کړې دي. د ده په وينا، په افغانستان کې د ترهګرو ډلو نه فعاليت، د ټولشموله دولت جوړول او د ښځو او نجونو په ګډون د بشر حقونو ته درناوی د امريکا اهداف دي.
ميلر ويلي: «له همدې کبله دا هغه څه دي چې موږ ورپسې يو … نه شم کولای ووايم چې کله طالبانو د پراخې استازولۍ په يوه غونډه کې د ګډون لپاره د نړيوالې ټولنې بلنه رد کړه، حيران شوم. خو لکه څرنګه چې مو وړاندې اورېدلي دي، وايم چې طالبان يوازيني افغانان نه دې چې د هيواد په راتلونکې کې ونډه لري. موږ به د ښځو او نجونو په ګډون د هيواد د راتلونکي د ټاکلو په لړ کې د ټولو افغانانو ملاتړ ته دوام ورکړو.»
د امريکا د بهرنيو چارو وزارت وياند په دوحه کې د افغانستان د مدني ټولنې له استازو سره د چين، روسيې او ايران د استازو د نه ليدنې په تړاو پوښتنې ته په ځواب کې ويلي، چې د نورو هيوادونو د اقداماتو په اړه خبرې نه کوي، خو د ده په وينا امريکا له مدني ټولنې سره تعامل رغنده ګڼي.
ميلر ويلي: «موږ هڅه کوو چې د خپلو اقداماتو له لارې مدني ټولنې د پياوړتيا لپاره اقدامات وکړو او يقينا د نړۍ ټول هيوادونه هڅوو چې دا مسير تعقيب کړي.»
روسيې رسما تایید کړه چې د طالبانو په غوښتنه يې په دوحه کې د افغانستان د مدني ټولنې له استازو او ښځينه فعالانو سره په غونډه کې له ګډونه ډډه کړې ده.
د دوحې غونډه چې د يکشنبې او دوشنبې په ورځو د ملګرو ملتونو د عمومي منشي په کوربتوب ترسره شوه، د افغانستان له مدني ښځينه فعالانو څخه پنځو تنو ګډون په کې کړی وو.
طالبان هم دې غونډې ته بلل شوي وو، خو د خپلو شرایطو د نه منلو له کبله يې له ګډونه ډډه وکړه.
د «افغانستان له خپلواکې ارزونې» سره سم له افغانستان سره منسجم تعامل د دوحې د غونډې له اهدافو څخه و. هيله کېده چې د امنيت شورا له پرېکړهليک سره سم به د افغانستان په چارو کې د ملګرو ملتونو له لوري يو ځانګړی استازی وټاکل شي، خو د ملګرو ملتونو عمومي منشي انټونيو ګوتريش د غونډې په پای کې اعلان وکړ چې د داسې استازي د ټاکلو لپاره مشوره کوي.
