اطلاعات روز: په ملګرو ملتونو کې د افغانستان د دایمي استازولۍ سرپرست نصیر احمد فایق د امنیت شورا په غونډه کې ویلي، چې په افغانستان کې ثبات او په نړیوال ټولنه کې د دغه هېواد د ګډون لپاره یو داسې ټولشموله سیستم ته اړتیا ده چې بنسټ یې د عدالت، د قانون حاکمیت او د خلکو د ارادې په اساس رامنځته شوی وي.
د امنیت شورا غونډه تېره شپه (جمعه، ۲۵ د کب) افغانستان کې د ملګرو ملتونو د مرستندویه پلاوي (یوناما) په اړه جوړه شوې وه. په دې غونډه کې د یوناما ماموریت یا د فعالیت دوره د یوه بل کال لپاره وغځول شوه.
فایق په دې غونډه کې په خپلو خبرو کې ویلي، چې د یوناما د ماموریت غځول مهم دي، ځکه چې افغانستان له سخت بحران سره مخ دی. د هغه په وينا، دغه بحران د طالبانو د نه ژمنتيا او له وضعيت سره د مقابلې، رغنده تعامل او د يوه عادلانه، مسوول، او ټولشموله حکومتي نظام په رامنځته کولو کې د دغې ډلې د ناتوانۍ له امله شدت موندلی دی.
نوموړي په افغانستان کې د سولې، ثبات او ټولشموله حکومتولۍ د ودې او همدارنګه د ښځو او نجونو د وضعیت په ګډون د بشري حقونو د څارنې او راپور ورکولو په برخه کې د یوناما رول مهم بللی دی.
فايق همداراز ویلي: «په افغانستان کې د ثبات او په نړیواله ټولنه کې د دغه هېواد بیا ګډون د حکومتولی داسې یو مشروع ټولشموله سیستم ته اړتیا لري چې بنسټ یې عدالت، د قانون حاکمیت او د خلکو اراده وي او د افغانانو او نړیوالې ټولنې اړتیاوو او اندېښنو ته ځواب ووايي.»
هغه هیله ښودلې، چې د ملګرو ملتونو تمرکز به د یوناما د ماموریت د نورو اړخونو ترڅنګ په سیاسي خبرو اترو کې هم لومړیتوب ولري.
په افغانستان کې د طالبانو د حاکمیت په وروستیو دوو کلونو کې د یوناما فعالیت له پراخو نیوکو سره مخ شوی دی. د نیوکه کوونکو په اند دغې ادارې د بشري حقونو د دفاع او د اغېزمن کار د رامنځته کولو په برخه کې کارنده ګام نه دی پورته کړی. همدارنګه د نیوکه کوونکو په وینا، یوناما په دې دوو کلونو کې له طالبانو سره د تعامل اړېکې پرمخ بیولې دي.
