اطلاعات روز: د ملګرو ملتونو د بشري مرستو د همغږۍ دفتر (اوچا) وايي، چې په افغانستان کې د وروستيو ورځو سختو ورښتونو له کبله ۵۴۰ کورونه او يو زر او ۵۰۰ جريبه کرنيزه ځمکه ويجاړه شوې ده.
د دې دفتر په راپور کې راغلي چې په اوو ولايتونو کې د شپږو پلونو او ۴۵۰ کيلومټره سړک په ګډون مهم بنسټونه هم ويجاړ شوي دي.
د اوچا راپور چې تېره ورځ (شنبه، ۱۱ د وري) خپور شوی، په کې راغلي چې د لومړنيو راپورونو او ارزونو پر اساس سختو بارانونو په شمال کې په فارياب، په ختيځ کې په ننګرهار او په مرکزي سيمو دايکندي کې ډېر زيانونه اړولي دي.
اوچا زیاته کړې، چې د مارچ پر ۲۱مه او له ۲۶مې څخه تر ۲۷مې پورې کوم سخت بارانونه شوي اووه تنه په کې مړه شوي او ۳۸۴ کورونه په کې زيانمن شوي دي.
د سيلاب له امله د تلفاتو راپورونه له فارياب او بادغيس ولايتونو څخه ورکړل شوي وو.
پېښو ته د رسيدو په چارو کې د طالبانو د دولت وزارت هم د تېر کال په کب مياشت کې اعلان کړی و چې په هيواد کې د سړې هوا، باران او واورې له کبله ۶۰ تنه مړه شوي دي.
د دې وزارت د شمېرو له مخې په کب میاشت کې د ورښتونو له امله يو زر او ۶۴۵ کورونه هم په کلي يا جزي توګه ويجاړ شوي. همدا راز په دې مياشت کې ۱۷۷ زره او ۹۱۱ څاروي هم تلف شوي دي.