اطلاعات روز: د اسلامي همکاریو د سازمان عمومي منشي طارق علي بخیت د طالبانو د بهرنیو چارو د وزارت له سرپرست امیر خان متقي سره په لیدنه کې له دې ډلې غوښتي چې د ښځو د کار او زده کړو په اړه پر خپله پرېکړه بیا ځلې غور وکړي.
دا لیدنه د پنجشنبې په ورځ (۸ د وږي) د کامرون په پلازمېنه یایونده کې د اسلامي همکاریو د سازمان د بهرنیو چارو د وزیرانو د پنځوسمې غونډې په څنډو کې شوې ده.
د اسلامي همکاریو سازمان په خپله اعلامیه کې ويلي چې په دې لیدنه کې د افغانستان د امنيتي، انساني او اقتصادي وضعیت او له تروریزم او نشيي توکو سره پر مبارزې خبرې شوې دي.
د اسلامي همکاریو د سازمان ځانګړي استازي د افغانستان په اړه د دې سازمان د بهرنیو چارو د وزیرانو د شورا د پرېکړهلیک تطبیقېدل تعقيب کړي دي.
د اسلامي همکاریو د سازمان له اعلامیې سره سم، طارق علي بخیت د طالبانو له چارواکو غوښتي چې د ښځو د کار او زده کړو په اړه پر خپلو پرېکړو بیا ځلې فکر وکړي.
طالبانو پر افغانستان تر واکمنېدو وروسته ښځې له منځني ښوونځي او د پوهنتون له لوړو زده کړو راګرزولې دي.
د طالبانو د لوړو زده کړو وزیر ندا محمد ندیم په خپلو تازه څرګندونو کې ويلي چې تر اوسه د نجونو د زده کړو زمینه نه ده برابره. ده ويلي: «تر اوسه هغه حالت ته نه یو رسېدلي چې يو ځل بیا د اناثو طبقې په وړاندې د پوهنتون او مکتب دروازې خلاصې کړو.»
ده زیاته کړې: «لکه څرنګه چې زده کړې تر امر ثاني ځنډيدلې دي، [په دې اړه پوښتنه کول] هم تر امر ثاني معطله ده.»
د طالبانو د لوړو زده کړو وزیر ادعا کړې چې د دې ډلې مخالفین د ښځو زده کړې «فرضیت» درجې ته رسوي. ده زیاته کړې چې «که څوک د حنفي فقهې له مخې په کوم کتاب کې د ښځو زده کړې ثابتولای شي، وزارت ته دې مراجعه وکړي او له ده سره دې بحث وکړي».