په سرپل کې یوې سرچینې ویلي چې د طالبانو یوه غړي د سوزمهقلعه ولسوالۍ کې یوه ۱۸ کلنه نجلۍ، چې دوه میاشتې مخکې یې په نکاح کې راوستې وه، په ډزو وژلې ده. په سرپل کې د طالبانو د پولیسو ویاند د دې ښځې مړینه تأیید کړې، خو ویلي یې دي چې نوموړې د کورني تاوتریخوالي له امله ځان وژنه کړې ده.
یوه ولسي سرچینې د «اطلاعات روز» ورځپاڼې ته په یوه پیغام کې ویلي چې دغه ځوانه نجلۍ د ګوسفندي ولسوالۍ اصلي اوسېدونکې وه او دوه میاشتې مخکې د طالبانو یوه غړي «تښتولې» او سوزمهقلعې ته یې راوستې وه. د سرچینې په وینا، دغه طالب د «زور» له لارې نجلۍ له ځان سره په نکاح کړې وه.
سرچینه وايي، د دغه طالب نوم حسن دی او یوه بله مېرمن هم لري. د سرچینې په وینا، حسن پرون (جمعه، ۳۰ د زمري) له خپلې مېرمنې سره له لفظي شخړې وروسته هغه وژلې ده.
یوه بله سرچینه هم ویلي چې حسن، چې د «سنګري» په مستعار نوم پېژندل کېږي، د سوزمهقلعې ولسوالۍ د طالبانو د ولسوال ساتونکی دی.
دویمې سرچینې هم د حسن د مېرمنې وژل کېدل تأیید کړي، خو ویلي یې دي چې د قتل عامل لا روښانه نه دی.
سرچینې ویلي چې حسن ادعا کوي مېرمنې یې ځان وژنه کړې، خو ډاکترانو ویلي چې مرمۍ له شا څخه لګېدلې او د ځان وژنې ادعا سمه نه ده.
دغه سرچینې، د قربانۍ له نجلۍ سره د طالبانو د دغه غړي د نکاح د شرایطو په اړه د یوې پوښتنې په ځواب کې ویلي چې «احتمال» شته نجلۍ تښتول شوې وي.
سرچینې ویلي: «همدومره معلومات لرم چې نجلۍ د ګوسفندي ولسوالۍ ده. یوه شپه دغه طالب نجلۍ خپل کلي کور ته راوسته. کله چې خبره د خلکو ترمنځ افشا شوه، سبا سهار څو عسکر راغلل او دواړه یې ولسوالۍ ته انتقال کړل. وروسته هلته د دوی نکاح وتړل شوه.»
د طالبانو د امنیه قوماندانۍ ویاند نقیبالله علمیار «اطلاعات روز» ته په یوه پیغام کې ویلي چې دغه ښځې د کورني تاوتریخوالي له امله ځان وژنه کړې ده.
هغه نور جزئیات نه دي ورکړي او دې پوښتنې ته یې هم ځواب نه دی ویلی چې ایا په تړاو یې څوک تر څېړنې یا قانوني تعقیب لاندې نیول شوي که نه.
