د افغانستان اسلامي وحدت ګوند د طالبانو د مشر ملا هبتالله اخوندزاده د څرګندونو په غبرګون کې ویلي، چې د افغانستان د خلکو د مذهبي تنوع نه منل او قومي او مذهبي تبعیض ته لمن وهل، نه یوازې ملي یووالی نه پیاوړی کوي، بلکې د بېباورۍ، ټولنیز واټن او ملي نفاق د پراخېدو او ژورېدو لامل هم کېږي.
دغه ګوند په یوه اعلامیه کې ویلي، چې «د افغانستان ټولو خلکو ته د یوه مذهب منسوبول، د هېواد د یو شمېر وګړو د هویت او باورونو انکار او د افغانستان د تاریخي او ټولنیزو واقعیتونو له پامه غورځول دي».
د طالبانو مشر ملا هبتالله اخوندزاده پرون د کابل پوهنتون په یوه غونډه کې ویلي وو، چې د افغانستان ټول وګړي د حنفي مذهب پیروان دي. تر دې وړاندې د طالبانو د لوړو زدهکړو وزیر هم ویلي وو، چې په افغانستان کې یوازې یو مذهب شته او هغه حنفي مذهب دی.
د افغانستان اسلامي وحدت ګوند د دغو څرګندونو په غبرګون کې په خپله اعلامیه کې ویلي: «افغانستان د تاریخي او ټولنیز پلوه یو متنوع او څوګونی هېواد دی، چې د بېلابېلو اسلامي مذهبونو، لکه حنفي، جعفري، اسماعیلي او شافعي پیروان، د عقیدوي لارو د نورو پلویانو، لکه سلفیانو او همدارنګه د هندوانو او سیکانو دیني لږکیو شتون د دغه هېواد د تاریخي، کلتوري او ټولنیز واقعیت برخه جوړوي.»
دغه ګوند زیاته کړې: «دا مذهبي او دیني تنوع، د قومي او ژبني تنوع په څېر، د افغانستان د تاریخي هویت نه بېلېدونکې برخه ده. له همدې امله، د افغانستان ټولو خلکو ته د یوه مذهب منسوبول، د هېواد د یو شمېر وګړو د هویت او باورونو انکار او د تاریخي او ټولنیزو واقعیتونو له پامه غورځول دي.»
د افغانستان اسلامي وحدت ګوند ویلي، «که څه هم د افغانستان ډېری وګړي د حنفي مذهب پیروان دي، خو د یوه مذهب اکثریتوالی هېڅ فرد یا ډلې ته دا حق نه ورکوي، چې د نورو وګړو مذهبي حقونه او ازادۍ له پامه وغورځوي او یا خپل مذهبي لیدلوری پر ټولنه تحمیل کړي».
د دغه ګوند په وینا، د وګړو مذهبي حقونه او ازادۍ باید د هر مذهب د پیروانو د شمېر په پام کې نیولو پرته، درناوی او ملاتړ یې وشي او هېڅوک حق نه لري، چې د مذهبي اکثریت په پلمه د نورو مذهبونو هویت او شتون رد یا څنډې ته کړي.
د افغانستان اسلامي وحدت ګوند زیاته کړې: «دغه څرګندونې د هزارهګانو او د افغانستان د شیعهګانو په اړه د طالبانو له سیاستونو او کړنو جلا نه شي ارزول کېدای.»
د دغه ګوند د اعلامیې له مخې، د طالبانو د واکمنۍ پر مهال هزاره ټولنه او د هېواد شیعه وګړي له سیاسي، ټولنیزو او کلتوري ډګرونو څنډې ته شوي او له پراخو محدودیتونو او تبعیض سره مخ شوي دي.
دغه ګوند په هرات او بامیانو کې د طالبانو له لوري د یو شمېر شیعه دیني عالمانو نیولو او د افغانستان د ټولو خلکو د حنفيمذهب بللو ادعا ته په اشارې پوښتنه کړې: «ایا دا څرګندونې د شیعهګانو د مذهبي هویت د انکار او د افغانستان په ټولنه کې د هغوی د حضور او ونډې اخیستنې د لارو د تړلو د هڅو یوه برخه نه ده؟»
د افغانستان اسلامي وحدت ګوند له نړیوالې ټولنې، ملګرو ملتونو، د بشري حقونو له نړیوالو بنسټونو او د نړۍ له اغېزناکو هېوادونو غوښتي، چې د طالبانو د قومي او مذهبي تبعیضپالونکو سیاستونو پر وړاندې چوپ پاتې نه شي او د څرګند دریځ او اغېزناکو اقداماتو له لارې د افغانستان د ټولو وګړو، په ځانګړي ډول د تبعیض او حذف له ګواښ سره مخ ټولنو، د حقونو، مذهبي ازادیو او تاریخي او کلتوري هویت ملاتړ وکړي.
طالبان په افغانستان کې د بیا واکمنېدو راهیسې په پراخه کچه د شیعه وګړو پر وړاندې په مذهبي تبعیض تورن شوي دي.
دغه ډلې د شیعهګانو یو شمېر مذهبي بنسټونه تړلي او د هغوی پر مذهبي فعالیتونو او د محرم میاشتې پر ماتمونو یې پراخ محدودیتونه لګولي دي.
