اسټرالیايي رسنیو راپور ورکړی چې یو افغان وګړی په خپل ګرځنده ټیلیفون کې د افراطي او تاوتریخوالي ډکې ویډیوګانو، لکه د ډلهییزو ډزو او یرغمل شویو کسانو د سر پرې کولو د صحنو، د ساتلو له امله نیول شوی دی.
د «ABC» شبکې د راپور له مخې، نیول شوی کس ۳۰ کلن محمد احمدزی دی چې افغانستان ته د سفر پر مهال د شنبې په ورځ، د وږي په ۲۱مه، د ملبورن له هوايي ډګر څخه نیول شوی دی.
د راپور له مخې، پلټونکو د هغه له ګرځنده ټیلیفون څخه افراطي او تاوتریخوالی لرونکي مطالب موندلي دي، چې په کې داسې ویډیوګانې هم شاملې دي چې د ډلهییزو ډزو او د یرغمل شویو کسانو د سر پرې کولو صحنې ښيي.
د استرالیا فدرالي پولیسو ویلي چې احمدزی له نورو کسانو سره د یوه ګروپي چټ غړی و او په دغه ګروپ کې افراطي او تاوتریخوالی لرونکي مطالب شریکېدل.
محمد احمدزی اوس د استرالیا د ویکټوریا ایالت په مرکز ملبورن کې د ښار په شمالي برخه کې ژوند کوي.
هغه د نیول کېدو پر مهال امنیتي چارواکو ته ویلي چې غوښتل یې افغانستان ته د خپل پلار د لیدو لپاره سفر وکړي.
محمد احمدزي په لومړي سر کې د هوايي ډګر د سرحدي ساتونکو له خوا د خپل ګرځنده ټیلیفون له پلټنې سره مخالفت کړی و. هغه اوس د «افراطي او تاوتریخوالي ډکو مطالبو د ساتلو» او «پولیسو ته د یوه برېښنايي وسیلې د لاسرسي د نه ورکولو» په تور نیول شوی دی.
احمدزي د یکشنبې په ماسپښین د ویډیو له لارې د ملبورن په ابتدايي محکمه کې محاکمې ته حاضر شو.
احمدزي د ضمانت غوښتنه کړې وه څو په موقتي توګه خوشې شي، خو قاضي له دې غوښتنې سره موافقه ونه کړه، څو نوموړی له هېواده د وتلو فرصت پیدا نه کړي.
ټاکل شوې چې د هغه قضیه د لا زیاتو څېړنو لپاره سبا، سهشنبه د سنبلې په ۲۴مه، یو ځل بیا په محکمه کې وڅېړل شي.
