عبدالله عبدالله، رییس شورای عالی مصالحه ملی در ادامه‌ی سفرهای منطقه‌ای خود برای جلب حمایت از تلاش‌های صلح، بعد از ظهر امروز (سه‌شنبه، ۲۰ عقرب) در رأس یک هیأت بلندرتبه به ازبیکستان رفت
شورای عالی مصالحه ملی در اعلامیه‌ای گفته است که آقای عبدالله به دعوت رسمی حکومت جمهوری ازبیکستان، به شهر تاشکند رفته است.
در اعلامیه گفته شده است که آقای عبدالله در جریان این سفر خود با رییس‌جمهوری، معاون نخست‌وزیر، وزیر خارجه، رییس بورد اسلامی، رییس کمیسیون امور دینی جمهوری ازبیکستان و شماری دیگر از مقام‌های بلندرتبه این کشور دیدار می‌کند.
طبق معلومات شورای عالی مصالحه ملی، عبدالله در دیدار با رهبران جمهوری ازبیکستان درباره‌ی روند صلح افغانستان و حمایت منطقه‌ای از تلاش‌های صلح در افغانستان بحث و گفت‌وگو می‌کند.
عبدالله پیش از این به‌منظور جلب حمایت منطقه‌ای از روند صلح افغانستان، به پاکستان، هند و ایران نیز سفر کرده بود.