عقب‌نشینی نیروهای افغان به تاجیکستان
khovar

۱۰۳۷ نیروی امنیتی دیگر از بدخشان افغانستان به تاجیکستان عقب‌نشینی کردند

خبرگزاری دولتی تاجیکستان (خاور) به نقل از بیانیه‌ی نیروهای مرزی آن کشور گزارش کرده است که ۱۰۳۷ سرباز نیروهای امنیتی و دفاعی افغان به دنبال درگیری با طالبان، وارد خاک تاجیکستان شده‌اند.

در گزارش خاور آمده است که این تعداد نیروهای افغان روز گذشته (یک‌شنبه، ۱۳ سرطان) پس از آن وارد خاک تاجیکستان شده‌اند که جنگ‌جویان گروه طالبان به ولسوالی‌های خواهان، شکی، نسی، مایمی، شغنان و اشکاشم ولایت بدخشان افغانستان حمله کردند.

طبق این گزارش، ولسوالی‌های یادشده ۹۱۰ کیلومتر مرز مشترک با تاجیکستان دارد.

خبرگزاری خاور گفته است که نیروهای مرزی تاجیکستان با درنظرداشت روابط خوب بشردوستانه و حسن همجواری، به نیروهای امنیتی افغان اجازه‌ی ورود داده‌اند.

این درحالی است که در چند روز اخیر جنگ در ولایت بدخشان شدت گرفته و شماری از ولسوالی‌های این ولایت به‌دست طالبان سقوط کرده است.

وزارت دفاع از اعزام صدها نیروی کماندو به بدخشان خبر داده و دفتر والی بدخشان نیز صبح امروز گفته است که در نتیجه‌ی عملیات زمینی نیروهای امنیتی، دفاعی و مردمی در مسیر فیض‌آباد – بهارک و منطقه‌ی یفتل بالا، تلفات سنگینی به گروه طالبان وارد شده و مناطق زیادی از وجود این گروه تصفیه شده است.

در طول دو هفته‌ی اخیر، نیروهای امنیتی افغان در چندین دسته‌ی جداگانه به تاجیکستان عقب‌نشینی کرده‌اند.

براساس آماری که خبرگزاری خاور ارایه کرده، شمار مجموعی این نیروها تا کنون به بیش از یک‌هزار و ۴۰۰ نفر رسیده است. شماری از خبرنگاران تاجیکستانی اما این آمار را یک‌هزار و ۵۸۲ نفر گزارش کرده‌اند.

منابع رسمی دولتی تا کنون در این مورد چیزی نگفته‌اند، اما روز گذشته رییس‌جمهور اشرف غنی در صحبت تلفنی با امام‌علی رحمان، رییس‌جمهور تاجیکستان گفته بود که شماری از شهروندان افغان در اثر ظلم و وحشت طالبان، به مناطق مرزی تاجیکستان پناه برده‌اند.

آقای غنی همچنین گفته بود که دولت جمهوری اسلامی افغانستان در قبال شهروندان خود مسئول است و به‌زودی اقدامات لازم را به‌منظور رسیدگی به آنان انجام خواهد داد.