وزارت امور داخله‌ی تاجیکستان خبر ایجاد پایگاه نظامی برای پولیس این کشور توسط چین را در نزدیکی مرز افغانستان تکذیب کرده است.
به گزارش خبرگزاری دولتی تاجیکستان (خاور) وزارت داخله‌ی این کشور روز گذشته (شنبه، ۸ عقرب) در بیانیه‌ای گفته است که ایجاد چنین پایگاهی توسط چین در خاک تاجیکستان در دستور کار نیست.
در بیانیه اما تأکید شده است که این وزارت و وزارت امینت عمومنی چین قرار است در چارچوب توافق میان دو طرف یک رزمایش مشترک نظامی را در ولایت بدخشان تاجیکستان برگزار کنند.
وزارت داخله‌ی تاجیکستان گفته که تمامی تجهیزات و هزینه‌های لازم در طول رزمایش مشترک توسط کشور چین تأمین می‌شود.
خبرگزاری فرانسه در تاریخ ۶ عقرب به نقل از یک سخن‌گوی پارلمان تاجیکستان گزارش کرده بود که چین برای پولیس این کشور یک پایگاه به هزینه‌ی ۸.۵ میلیون دالر در نزدیکی مرز افغانستان می‌سازد.
او گفته بود که مجلس نمایندگان تاجیکستان، طرح ساخت این پایگاه را در منطقه‌ی «اشکاشم» در ولایت خودمختار کوهستانی بدخشان تصویب کرده است.
به گفته‌ی او، تمامی ساخت‌وساز این پایگاه نظامی از سوی دولت چین تأمین می‌شود. این سخن‌گوی پارلمان تاجیکستان افزوده است که پولیس این کشور به این پایگاه پس از ساخت آن منتقل می‌شوند.
وزارت خارجه‌ی چین اما از ساخت این پایگاه در آن هنگام اظهار بی‌اطلاعی کرده بود.