روسیه و تاجیکستان در امتداد مرز شمالی افغانستان، رزمایش مشترک نظامی برگزار کرده‌اند.
این رزمایش دیروز (دوشنبه، ۱۴ حمل) در میدان آموزشی «خراب‌میدان» تاجیکستان آغاز شد و تا سه روز دیگر ادامه خواهد داشت.
خبرگزاری تاس نوشته است که در این رزمایش، گروه‌های نظامی روسیه و تاجیکستان آماده‌سازی و اجرای عملیات مشترک در مناطق کوهستانی برای از بین‌بردن باندهای مسلح و تشکلات مسلح غیرقانونی را تمرین می‌کنند.
به‌نوشته‌ی این رسانه، گروه نظامی روسیه که در این رزمایش شرکت کرده عمدتا از واحدهایی از پایگاه نظامی ۲۰۱ با بیش از ۳۰۰ پرسنل متشکل از تفنگ موتوری، زرهی، توپ‌خانه، تشعشعات، نیروهای حفاظت شیمیایی و بیولوژیکی و گروه‌های جنگ الکترونیک هستند.
کشورهای آسیای مرکزی و روسیه پیش از این هم در شمال افغانستان رزمایش نظامی برگزار کرده بودند.
این کشورها می‌گویند که نگران نفوذ گروه‌های تروریستی از شمال افغانستان به آسیای مرکزی اند.
چندی پیش آناتولی سیدوروف، رییس ستاد مشترک سازمان پیمان امنیت جمعی گفته بود که شمار جنگ‌جویان داعش به شش هزار و ۵۰۰ نفر رسیده که چهار هزار آن در نزدیکی مرز تاجیکستان متمرکز شده‌اند.