اطلاعات روز: محمد اشرف غنی، رییس جمهور کشور برای یک سفر رسمی دو روزه، در رأس یک هیأت عالی‌رتبه‌ی دولتی، عازم عشق‌آباد، پایتخت ترکمنستان شد. رییس جمهور در این سفر با قربان قلی بردی محمدوف، رییس جمهور ترکمنستان و شماری از مقام‌های دیگر این کشور گفت‌و‌گو می‌کند.
دفتر رسانه‌های ریاست جمهوری با نشر خبرنامه‌‌ای اعلام کرد که رییس جمهور غنی در دیدار با همتای ترکمنستانی‌اش، روی تحکیم روابط میان دو کشور در عرصه‌های اقتصادی، تجار‌ی، فرهنگی و مسایل منطقه‌ای بحث و گفت‌و‌گو می‌کند. ترکمنستان در سال‌های گذشته در بخش‌های انرژی و برق، تجارت و صحت با حکومت همکاری داشته است.
محمد محقق، معاون ریاست اجرایی، عبدالرشید دوستم، معاون اول ریاست جمهوری، محمد حنیف اتمر، مشاور امنیت ملی، عمر زاخیلوال، مشاور اقتصاد ملی، سرپرست وزارت‌های خارجه، اقتصاد، انرژی و آب، معادن و پترولیم، ترانسپورت و هوانوردی و تحصیلات عالی، رییس اداره‌ی امور و نظیف‌الله سالارزی در این سفر اشرف غنی را همراهی می‌کنند.