رسانههای تاجیکستانی گزارش داده‌اند که دو نفر هنگام قاچاق مواد مخدر از خاک افغانستان و در پی درگیری مسلحانه با مرزبانان تاجیکستان کشته شده‌اند.
رسانه تاجیکستانی «پامیر انساید» امروز (جمعه، ۳۰ اسد) در گزارشی به نقل از کمیته امنیت ملی تاجیکستان نوشت که افراد کشته‌شده شهروندان افغانستان بودند.
در این گزارش زمان دقیق وقوع رویداد مشخص نشده، اما گفته شده است که این افراد هنگام ورود به خاک تاجیکستان مسلح بودند.
در گزارش آمده است که دو شهروند افغانستان که باشندگان اصلی روستای برزنگی ولسوالی امام صاحب ولایت قندوز بودند و وارد منطقه‌ی فتح‌آباد پنج جماعت، از مربوطات ولسوالی جیحون ولایت ختلان تاجیکستان شده بودند.
مقام‌های امنیتی تاجیکستان گفته‌اند که این افراد با هشدارهای امنیتی متوقف نشده و به سوی مرزبانان آتش گشودند که در نتیجه‌ی درگیری از پا درآمدند.
مرزبانان تاجیکستانی از نزد این دو نفر یک کلاشینکوف، یک تفنگچه ماکاروف و دو کوله‌پشتی حاوی ۱۷ کیلوگرام حشیش کشف و ضبط کرده‌اند.
مقام‌های محلی طالبان در شمال کشور تا هنوز در این مورد اظهار نظر نکردهاند.
اگرچند طالبان ادعا دارند که با تولید و تجارت مواد مخدر مقابله می‌کنند، اما قاچاق مواد مخدر به کشورهای آسیای مرکزی هر ماه خبرساز می‌شود. در برخی موارد قاچاقبران برای انتقال مواد مخدر از افغانستان به خاک کشورهای آسیای مرکزی از پهپاد و جاسازی در داخل ماشین‌آلات و کالاهای صادراتی نیز کار می‌گیرند.
