اطلاعات روز: کابل کې د ایمرجنسي روغتون وايي، چې د کابل شهرنو کې پر مېلمستون د برید ۲۱ قربانیان دغه روغتون ته انتقال شوي دي.
دغه روغتون په یوه ټویټ کې زیاته کړې، چې درې کسان روغتون ته تر انتقال مخکې مړه شوي. د قربانیانو هویت لا نه دی څرګند.
دا په داسې حال کې ده چې طالبان وايي، چې په دې بريد کې چاته زيان نه دى اوښتى.
دا برید نن (دوشنبه، ۲۱ د لیندۍ) شاوخوا ۲:۳۰ بجې د کابل په شهرنو کې پر یوه هوټل شوی دی. ویل کیږي چې په دغه هوټل کې چینايي اتباع اوسیدل. په دې سیمه کې د ډزو او څو چاودنو غږونه هم اورېدل شوي دي.
د طالبانو وياند ذبيح الله مجاهد وايي، چې دغه بريد د درېيو بريدګرو په وژل کېدو سره پای ته رسېدلی دی.
مجاهد په یوه ټویټ کې لیکلي، چې د هوټل ټول مېلمانه ژغورل شوي او هیڅ بهرنی کس نه دی وژل شوی.
د طالبانو ویاند زیاته کړې، چې دوه بهرني اتباع چې له ودانۍ څخه یې ځانونه غورځولي وو ژوبل شوي دي. هغه دا نه ده په ډاګه کړې چې دغه دوه کسان د کوم هېواد اتباع دي.
د چین شینهوای خبري اژانس د عیني شاهدانو په حواله راپور ورکړی، چې چاودنه هغه مېلمستون ته څېرمه شوې چې یو شمېر چینایان پکې اوسېدل.
په همدې حال کې د چین سفارت ویلي چې وضعیت له نږدې څاري.
دا برید یوه ورځ وروسته له هغې کېږي چې په کابل کې د چین سفیر وانګ یو له طالبانو غوښتي و چې د دغه هېواد د سفارت امنیت ته ډېره پاملرنه وکړي.
تر اوسه کومې ډلې د دې برید مسوولیت نه دی منلی.
