اطلاعات روز: د پکتیکا ولایت په برمل او جانیخېلو ولسوالیو کې د جلا طبیعي پېښو پر مهال د یو ماشوم په ګډون دوه کسان مړه شوي او یوه مېرمن پکې ټپي شوې ده.
په دغه ولایت کې یوې ځايي سرچینې اطلاعات روز ته وویل، چې تېره ورځ (دوشنبه، ۱۴ د وري) په برمل ولسوالۍ کې له یو غره پر یوه کور ډبره را لوېدلې چې له امله یې د یوې خونې چت راپرېوتی او پر مهال یې یو ماشوم مړ شوی او یوه مېرمن ټپي ده.
په همدې ورځ د دغه ولایت په جانیخېلو ولسوالۍ کې بیا د تندر راپرېوتو پېښه کې یو کس ژوند بایللی دی.
د پکتیکا ولایت لپاره د طالبانو ولایتي مسوولینو هم د دې پېښو په اړه محلي رسنیو ته پخلی کړی او ویلي دي چې د وروستیو ورښتونو له کبله د دغه ولایت په ګڼو سیمو کې خلکو ته مالي زیانونه رسېدلي دي.
دا په داسې حال کې ده، چې هیواد کې د وروستیو ورښتونو له امله په ګڼو ولایتونو کې د ځاني زیان ترڅنګ سېلابونو پراخې کرنیزې ځمکې له منځه وړې او خلکو ته یې په لویه کچه مالي زیانونه هم اړولي دي.
