اطلاعات روز: په پکتيکا ولايت کې ځايي سرچينې وايي چې تېره شپه (پنجشنبه، ۲۲ د چنګاښ) د دې ولايت په مرکز ښرنه کې د تحريک طالبان پاکستان (TTP) يو غړی قاري محمد داوزی چې په محمد ابراهيم مشهور و، د نامعلومو کسانو له لوري وژل شوی دی.
سرچينې زياته کړې چې ابراهيم د کورمې ايجنسي اوسېدونکی و او د جماعت الاحرار ډلې مهم غړی بلل شوی دی.
د نوموړي په اړه ويل شوي چې ابراهيم د پاکستاني طالبانو د يو مشر خالد خراساني له نږدې ملګرو و او د پاکستان حکومت ورباندې يو ميليون پاکستانۍ کلدارې انعام هم ايښی و.
په پاکستان کې يو مشهور خبريال او د سياسي چارو کارپوه طاهر خان هم په خپله ټويټر پاڼه د ابراهيم د وژنې پخلی کړی دی.
تر اوسه په پکتيکا کې د طالبانو امنيتي مسوولينو د دې پېښې په اړه څه نه دي ويلي، خو ياد کس په داسې مهال وژل کيږي چې د پاکستان د پوځ مشر جنرال عاصم منير د پاکستان د بلوچستان ايالت په کويټه ښار کې د خپلو ټپي شويو سرتيرو د ليدنې پر مهال يو ځل بيا په افغانستان کې د پاکستاني طالبانو د فعاليتونو او پاکستاني اړخ ته يې د بريدونو پر دوام اندېښنه ښوولې.
همدا راز يې د طالبانو د حکومت له مشرانو غوښتنه کړې چې اجازه دي نه ورکوي چې خاوره يې د نورو پر ضد وکارېږي.
