اطلاعات روز: کونړ کې ځايي سرچینې وايي، چې د طالبانو استخباراتو په دغه ولایت کې یو پخوانی افغان ژباړن چې له امریکايي پوځیانو سره یې دنده ترسره کړې وه، تر شکنجې لاندې وژلی دی.
یوې ځایي سرچینې د نوم نه یادولو په شرط وویل، چې دغه ژباړن طالبانو درې ورځې وړاندې (یکشنبه، د سلواغې ۱) د کونړ په مرکز اسعد آباد کې نیولی و او وړمه ورځ یې د سرکاڼو ولسوالۍ په یوه دښتنه کې جسد موندل شوی.
سرچینه زیاتوي، چې طالبانو دغه افغان ژباړن تر نیولو وروسته سخت شکنجه کړی او تر شکنجې لاندې یې ژوند له لاسه ورکړی، چې پر بدن یې د سختې شکنجې نښې لیدل شوي دي.
سرچینې د وژل شوي افغان ژباړن د هویت په تړاو نور جزیات ورنه کړل.
سرچینې د دغه وژل شوي ژباړن د پلار له قوله وویل، چې زوی یې واک ته د طالبانو له رسېدو وروسته په نا معلوم ځای کې پټ و، چې د طالبانو استخباراتو یې له اوږدې مودې راهیسې د نیولو هڅې پېل کړې وې.
تراوسه د دغه وژل شوي افغان ژباړن د وژل کېدو په تړاو کونړ کې ځايي طالب چارواکو څه نه دي ویلي.
واک ته د طالبانو له رسېدو وروسته کونړ کې د بهرنیو ځواکونو او پخواني جمهوري نظام ګڼ کارکوونکي د طالبانو له لوري نیول شوي، بندیان شوي، شکنجه شوي او حتی وژل شوي دي.