اطلاعات روز: پاکستانۍ رسنیو راپور ورکړی چې په شمالي وزیرستان کې د وسله والو سره په نښته کې د دې هیواد د پوځ څلور غړي وژل شوي دي.
د جیو نیوز د راپور له مخې، د پاکستان پوځ نن (شنبه، ۲۷ د سلواغې) اعلان کړی چې دا کسان په «میران شاه» کې د عملیاتو پرمهال کې وژل شوي دي.
د پاکستان پوځ ویلي، چې په نښته کې شپږ وسله وال هم وژل شوي دي.
د «خراسان داییري» ورځپاڼې بیا راپور ورکړی چې د دې برید مسوولیت د «حافظ ګل بهادر» ډلې په غاړه اخیستی دی.
حافظ ګل بهادر د تحریک طالبان پاکستان (ټي ټي پي) پخوانی قومندان دی، چې اوس له دې ډلې څخه جلا شوی او په خپلواکه توګه فعالیت کوي.
پاکستاني چارواکو په وار وار ادعا کړې چې حافظ ګل بهادر او د هغه ځواکونه په افغانستان کې شتون لري او د هغه د سپارلو غوښتنه یې کړې ده.
خو، افغان طالبان د حافظ ګل بهادر او د هغه د ځواکونو شتون ردوي او ادعا کوي چې دوی د پاکستان په خاوره کې شتون لري.
له هغه وخت راهیسې چې طالبانو پر افغانستان ولکه ټینګه کړې د پاکستان او افغانستان په سرحدي سیمو کې ناامني د پام وړ زیاته شوې ده.
پاکستاني چارواکي وايي، چې د ټي ټي پي او له هغې جلا شوې ډلې چې د دې بریدونو مسوولې دي، په افغانستان کې خوندي ځایونه لري.
د ملګرو ملتونو امنیت شورا په یوه نوي راپور کې په افغانستان کې د تحریک طالبان پاکستان شتون تایید کړی او ویلي یې دي چې دا ډله د تاجکستاني طالبانو سره یوځای د القاعده لخوا روزل کېږي.
