اطلاعات روز: چارواکي وايي، وړمه شپه وسله والو طالبانو د کونړ ولایت چپې درې ولسوالۍ کې پر ځینو امنیتي پوستو ډلهییز بریدونه کړي وو، چې د دواړو لوریو ترمنځ د تېرې ورځې تر مازیګره جګړې شوي دي.
د ملي پوځ د دویېمې پلې لوا مطبوعاتي مسوول شاهد ساپي نن (یکشنبه، ۱۵ د وري) اطلاعات روز ورځپاڼې ته وویل، دغې جګړې کې د ملي پوځ پنځه سرتیري او ۲۸ طالبان وژل شوي او دغه راز درې سرتیري او ۷ طالبان ټپيان شوي دي.
ساپی وویل، دغه جګړه د کونړ د چپې درې په ګلسلک، تره نیک او کرنل سیمو کې شوې ده، چې د جګړې پرمهال د ملي اردو له توپچي او هوايي قوې کار اخیستل شوی دی.
ساپي زیاته کړه: «کونړ کې د وسله والو طالبانو او افغان ځواکونو ترمنځ جګړه کې پنځه افغان سرتیري وژل شوي او همدارنګه ۲۸ وسله وال طالبان وژل شوي دي.»
هغه وایې، دغې جګړې کې د کونړ لپاره د وسله والو طالبانو د استخباراتو مسوول هم ژوبلېدلی دی، خو طالبانو په دې اړه څه نه دي ویلي.
د سیمې اوسېدونکي ګل خان بیا اطلاعات روز ورځپاڼي ته وویل، د شنبې ورځې جګړه کې طالبانو د پوستو ترڅنګ هغې قطار ته هم کمین نیولی و، چې تازه دمي سرتیري یې جګړې ته وړل.
هغه وایې، په یادې جګړې کې دواړو لوریو ته د مرګ – ژوبلې اوښتو تر څنګ وسله والو ځینې سرتیري ژوندي هم وړي دي.
طالب ویاند ذبېح الله مجاهد اطلاعات روز ورځپاڼې سره اړیکه کې وویل، چپې درې په ګلسلک او کرنل سیمو کې یې پر ځینو حکومتي پوستو بریدونو کې ۱۲ سرتیري وژلي او پنځه یې ژوندي نیولي دي.
طالبانو ویلي، دوی د حکومت د یوې پوستې د سقوط کولو تر څنګ ځینې وسلې او مهمات هم له ځانه سره وړي دي، خو حکومتي غاړه د طالبانو دا ادعا ردوي.
د سولې خبرو سره هم مهاله ټول هېواد کې د جګړو او تشدد پېښو زور اخیستی. حکومت او طالبان دواړه یو پر بل نیوکې کوي، چې جګړې تودوي او د سولې پر وړاندې خنډونه جوړوي.