په خوست کې سیمه ییز چارواکو په دغه ولایت کې د شاوخوا ۳۷۷ میلیونه افغانیو په لګښت د برېښنا رسونې د پنځو لویو پروژو چارې پیل خبر ورکړی.
د خوست د برېښنا ریاست لپاره د طالبانو رئیس مولوي عزتالله مخلص وايي، دغه پروژې د مرکز متون، صبریو، منګل کوټ او ځینو نورو سیمو ته د برېښنا رسولو په موخه پلې کېږي.
د مخلص د مالوماتو له مخې، د دغو پروژو له بشپړېدو سره به له اوو زرو تر ۱۵ زرو پورې کورنۍ د برېښنا له اسانتیاوو برخمنې شي.
نوموړي زیاته کړه چې د پروژو ټول اړین تخنیکي وسایل به د افغانستان برېښنا شرکت د مرکزي ریاست له لوري برابر او په لنډ وخت کې خوست ته ولېږدول شي.
بلخوا د افغانستان برېښنا شرکت لپاره د طالبانو اجرائیوي رئیس عبدالحق همکار ویلي، په ټول هېواد کې د برېښنا رسونې ګڼې لویې پروژې روانې دي.
د هغه په وینا، د ۱۴۰۵ لمریز کال لپاره د برېښنا د پراختیا په برخه کې شاوخوا ۱۵ میلیارده افغانۍ بودیجه ځانګړې شوې ده.
نوموړي وویل، هڅه کېږي چې د وارداتي برېښنا پر ځای په کور دننه له لمریزې، بادي، سکرو او نورو سرچینو څخه د برېښنا د تولید لپاره ګټه واخیستل شي.
په ورته مهال که څه هم خوست مېشتي د دغو پروژو له پیل څخه خوښ دي، خو اندېښنه لري چې په تېرو کلونو کې هم د برېښنا رسونې ځینې پروژې پیل شوې وې، خو د نامعلومو دلایلو له امله یې چارې نیمګړې پاتې شوې دي.
د صبریو ولسوالۍ یوه اوسېدونکي، شمسالرحمن وویل، چې تېر کال هم دغې ولسوالۍ ته د برېښنا رسونې د یوې پروژې چارې پیل شوې وې، خو وروسته یې کارونه نیمایي کې ودرول شول.
نوموړي غوښتنه وکړه چې دا ځل دې د برېښنا رسونې پروژې پر ټاکلي وخت بشپړې شي، څو خلک له برېښنا برخمن شي.
هغه زیاته کړه چې د برېښنا نشتون د خوست اوسېدونکي له ګڼو ستونزو سره مخ کړي دي.
