په کندهار سیمهییزې سرچینې وايي، د دغه ولایت د شاه ولیکوټ ولسوالۍ اړوند «دهلې بند» کې د یوې کورنۍ پنځه غړي، چې یو پلار او څلور اولادونه دي، په اوبو کې د ډوبېدو له امله مړه شوي دي.
د سرچینو په وینا، پېښه تېره ورځ (چهارشنبه، ٤ د وږي) مازدیګر هغه مهال رامنځته شوې، چې ۳۳ کلن نوراحمد له خپلو څلورو اولادونو سره د تفریح لپاره «دهلې بند» ته تللی و. ویل کېږي چې یاده پېښه د کښتۍ د چپه کېدو له امله رامنځته شوې ده.
سرچینې زیاتوي چې په پېښه کې یو کوچنی ماشوم ژغورل شوی، خو د نوراحمد او د هغه د درې نورو اولادونو د برخلیک په اړه د لټون هڅې روانې دي.
د سرچینې د مالوماتو له مخې، تر دې دمه د نوموړي د دوو لوڼو جسدونه موندل شوي دي.
د سرچینو په خبره، نوراحمد د ژړۍ ولسوالۍ د «سنځري» سیمې اصلي اوسېدونکی و، چې د کندهار ښار د چهارسو په بازار کې یې دوکانداري کوله او له خپلو پنځو اولادونو سره د مېلې او ساعتېرۍ په موخه دهلې بند ته تللی و.
تر اوسه د پېښې په اړه د ځایي طالب مسولانو له لوري رسمي معلومات نه دي خپاره شوي.
په کندهار کې تر دې مخکې هم لسګونه کسان په اوبو کې د ډوبېدو له امله مړه شوي وو.
