اطلاعات روز: طالبانو ډلې افغانستان کې بهرنیو ځواکونو سره ژباړونکو او ساتونکو ته ډاد ورکړی، چې له هېواده و نه تښتي، ځکه د دوی له خوا ورته کوم ګواښ نشته.
د طالبانو ډلې ویاند ذبیح الله مجاهد نن (دوشنبه، ۱۷ د غبرګولي) پر ټوېټر د یوې اعلامیې په خپرولو سره ویلي، اوس چې بهرني ځواکونه له افغانستانه وځي، دغه افغانان هم غواړي چې له هیواده تېښته وکړي او ویره لري.
خو اعلامیه وایي: «یادو ټولو کسانو ته د اسلامي امارت لخوا خبر ورکول کیږي چې هغوی باید ټول پخپلو تیرو کړنو باندې پيښمانه واوسي، او د راتلونکي لپاره بیا داسې لاره غوره نه کړي چې هغه د اسلام او هیواد سره خیانت بلل کیږي.»
د طالبانو ډلې دغه اعلامیه زیاتوي، چې اوس دې هيڅوک هم له هیواده تيښته نه کوي او طالبان په هغوی کار نه لري، بلکې بلنه ورکوي چې خپل عادي ژوند ته راوګرځي او په وینا یې که دا هر یو په کومه برخه کې تخصص لري، د خپل هیواد چوپړ دې وکړي.
د دوی په وینا دا ژباړونکي او ساتونکي او دغه راز له بهرنیانو سره نور کارکوونکي هغه مهال دوی خپل «دښمنان» بللل، چې له بهرنیانو سره ول، خو په وینا یې چې اوس د دوی له خوا هېڅ کوم ګواښ ورته متوجه نه دی.
د طالبانو دغه ډله زیاتوي، که څوک هسي ځان ته خطر پلمه کوي او بهر ته د تګ لپاره په «جعلي» ډول «کېس» جوړوي، په وینا یې چې دا د هغوی خپله ستونزه ده.
دا په داسې حال کې ده، چې د ځینو نړیوالو رسنیو د راپور له مخې، بریتانیا غواړي هغه افغانان دې هېواد ته وغواړي چې له دوی سره یې د ژباړونکو او نورو برخو کې کار کړي او اوس یې ژوند ته ګواښ دی.