اطلاعات روز: ابجوشې چې په نړیواله کچه خاص شهرت لري له يو ډول سختو انګورو څخه په لاس راځي. د کندهار باغ لرونکي وايي، سږکال یې د وچکالۍ سره-سره د ابجوشو حاصلات د نورو کلونو په پرتله زیات دي.
د کندهار د سوداګرۍ خوني مسوولین وایي ترلاسه شوي ابجوشې به سږ کال بياهم د يو شمير اسيايي او عربي هېوادونو مارکيټونو ته واستول شي.
د دې ولایت په پنجوايي، ډنډ او ځينو نورو ولسواليو کي د ابجوشو د وچولو لپاره لوی لوی میدانونه جوړ شوي دي چې په دې موسم کې پرې انګور وچیږي او وروسته ترې ابجوشې جوړیږي چې دا بېلابېلې مرحلې لري.
کندهارۍ ابجوشې چې په نړيواله کچه ښه بازار لري، بڼوال يې مارکيټ ته له وړاندې کولو مخکې پر هوارو ميدانونو په دوديزه بڼه چمتو کوي.
عبدالبصير د کندهار د پنجوايي ولسوالۍ د «نو-دهې» په کلي کي د خپلو اولادونو سره یو ځای د انګورو په داغولو بوخت دی.
نوموړی وايي د «ایته» په نوم له یو ډول انګورو څخه ابجوشې جوړیږي، چې د ځانګړي خوند او کيفيت څخه برخمنې دي.
عبدالبصیر زیاتوي: «لومړی انګور په باغ کې دانې کوو، بیا دلته کوډلې ته راوړو، له هغه وروسته بیا د جوش یا پخولو مرحله ده، لومړی په جوش اوبو کې وینځل کېږي، په تیزابو کې جوش ورکول کېږي، وروسته پر پاکه ځانګړې ځمکه لمراو باد ته هوارېږي او تر هغه وروسته په ځانګړو کارټنونو کې بسته کېږي او لېږل کېږي.»
د عبدالباقي په نوم يو بل بڼوال بيا وايي، چي سږکال د وچکالۍ سره-سره کندهار کې زياتې ابجوشې پروسس شوي او تمه لري، چې په کورنیو او بهرنیو مارکيټونو کې به یې بازار هم مناست وي.
عبدالباقي زیاتوي: «که څه هم سږ کال طبعي افتونه زیات و، وچکالي وه، جګړه وه، خو بیا هم زموږ حاصلات ښه دي او انشاءالله موږ به ښه عاید تر لاسه کړو.»
د کندهار د سوادګرۍ خونې مسوولين هم وایي، چې سږ کال کندهار کې د انګورو څخه زياتې ابجوشې په لاس راغلي، چې له ۱۳ زره ټنه څخه زياتې به يې د پاکستان او هند په ګډون د متحده عربي اماراتو مارکيټونو ته واستول شي.
د سوداګرۍ خونې غړی عبدالباقي بنا زیاتوي: «د کندهار ابجوشې چې د وچې مېوې هر مارکېټ ته رسېدلي، هلته یې ځانګړي علاقمندان پیدا کړي، آن دا په نړيوالو مارکېټونو کې د «طلايي کشمشو» په نوم یادېږي او ښه بازار لري.»
پنجوایي، ژړۍ او ميوند د کندهار هغه ولسوالۍ دي، چې سږ کال يې د انګورو باغونو د نورو کلونو په پرتله تر ټولو زیات حاصلات ورکړي دي.
مسوولين وایي هڅه کوي، د کرنيزو محصولاتو لپاره د سیمې نوو مارکيتونو ته لار پېدا کړي.