اطلاعات روز: مقام‌ها در وزارت مهاجرین و عودت کنندگان گفته‌اند که در سال جاری 124 هزار تن به‌طور قانونی به خارج از کشور، مهاجرت کرده‌اند.
اما وزارت مهاجرین گفته که تاکنون آمار دقیق در مورد افرادی‌که کشور را به‌طور غیرقانونی ترک کرده‌اند، در دست نیست.
اسلام‌الدین جرأت، سخن‌گوی وزارت مهاجرین گفته است، تعداد زیادی از شهروندان کشور بدون دریافت مجوزهای قانونی کشور را ترک کرده و از راه‌های قاچاق خودشان را به کشورهای اروپایی رسانده‌اند.
به گفته وی، جمعیت اصلی مهاجران افغانستان را افرادی تشکیل می‌دهند که از راه‌های غیرقانونی به خارج رفته‌اند.
سازمان ملل آماری را نشر کرده است که در سال جاری 26 هزار نفر از مهاجران کشورهای مختلف در مسیر راه اروپا جان داده‌اند که 12 درصد آن را مهاجران افغان تشکیل می‌دهد.
آقای جرأت افزوده که نشستی با 15 تن از سفیران کشورهای اروپایی برای حل مشکلات پناه‌جویان افغان، در کابل برگزار شده است.
به گفته‌ی جرأت، در این نشست از آنان خواسته شده که در مورد اخراج مهاجران افغانستان، تجدید نظر کنند.
طبق آخرین گزارشات نشر شده شمار مهاجرین افغانستان در بسیاری از کشورهای اروپایی نسبت به مهاجرین سوریه افزایش یافته است.
