اطلاعات روز: کشور شاهی سویدن در دیداری با رییس جمهور غنی وعده داده که این کشور مبلغ 7.8 میلیارد کرون سویدنی معادل به 920 میلیون دالر، به افغانستان کمک می‌کند.
سویدن این مبلغ را برای ده سال آينده، در بخش‌های مختلف به افغانستان کمک می‌کند.
رییس جمهور غنی در سلسله سفرهای خود به کشورهای اروپایی روز جمعه با استیفن لووین، نخست وزیر کشور شاهی سویدن، در کاخ صدارت این کشور دیدار کرد. در این دیدار هر دو مقام در مورد گسترش روابط میان دو کشور در بخش‌های مختلف گفت‌وگو نمودند.
به نقل از خبرنامه ریاست جمهوری، در سفر رییس جمهور به سویدن، توافق‌نامه همکاری‌های انکشافی میان افغانستان و سویدن نیز به امضا رسید.
در خبرنامه آمده است که بر اساس این توافق‌نامه، کشور سویدن، مبلغ 920 میلیون دالر را برای ده سال در عرصه‌های مختلف به افغانستان کمک می‌کند.
رییس جمهور غنی هم‌چنان از ادامه کمک‌های سویدن به افغانستان تا سال ۲۰۲۴ میلادی تشکر نموده و گفته است ادامه کمک‌های سویدن اعتماد این کشور را به افغانستان نشان می‌دهد.
در همین حال مقام‌های ارشد حکومت سویدن و شماری از رهبران احزاب سیاسی این کشور در دیدار شان با رییس جمهور کشور بر حمایت دراز مدت شان از افغانستان تاکید کرده‌اند.
