عکس: شبکه‌های اجتماعی

«گفت‌وگوهای امنیتی هرات»؛ نگرانی تاجیکستان از فعالیت‌ گروه‌های تروریستی در افغانستان

دهمین نشست «گفت‌وگوهای امنیتی هرات» صبح امروز (سه‌شنبه، ۸ قوس) در دوشنبه، پایتخت تاجیکستان افتتاح شد.

فرهاد سلیم، معاون وزیر امور خارجه‌ی تاجیکستان در آغاز این نشست گفت که گروه‌های تروریستی در افغانستان افزایش یافته است. او از گروه‌های داعش و القاعده نامبرد.

این مقام تاجیکستانی افزود که تولید و قاچاق مواد مخدر نیز در افغانستان افزایش یافته است.

او در بخشی از سخنرانی خود افزود که تاجیکستان خواهان ایجاد یک حکومت همه‌شمول در افغانستان است: «سیاست تاجیکستان حمایت از ایجاد یک دولت فراگیر در افغانستان است که می‌تواند منجر به پایان جنگ نیم قرنی در افغانستان و دستیابی به عدالت اجتماعی شود.»

انستیتوت مطالعات استراتژیک افغانستان دور دهم نشست سالانه‌ی «گفت‌وگوهای امنیتی هرات» را برای امروز و فردا در پایتخت تاجیکستان برنامه‌ریزی کرده است.

موضوع این نشست «نظام سیاسی همه‌شمول؛ الگوها و نقشه‌ راه» است.

در این نشست نمایندگان کشورهای خارجی از جمله کرن دیکر، کاردار سفارت امریکا برای افغانستان نیز اشتراک کرده است.

دیکر این نشست را فرصت عالی برای تبادل نظر در مورد وضعیت افغانستان با نمایندگان این کشور، تاجیکستان، کشورهای منطقه و اتحادیه اروپا خوانده است.